Rabitə və İnformasiya Texnologiyaları Nazirliyinin elektron xəbər xidməti
İnternetdə yeni axtarış sistemi peyda olub (VİDEO)
"Volunia" adlı yeni axtarış sisteminin sınağına başlanılır. "Volunia" - Paduan Universitetinin (İtaliya) professoru Massimo Marçiorinin (Massimo Marchiori) "uşağı”dır. İtaliya alimini Tim Berners-Li ilə bərabər internetin yaradıcılarından biri adlandırırlar.
O, Ümumdünya hörümçək toru (World Wide Web Consortium, W3C) konsorsiumunun üzvü, "P3P" internet protokolunun yaradıcılarından biri, "XQuery" və "OWL" veb- standartlarının həmmüəllifidir. Marçiori "HyperSearch" axtarış mühərrikini hazırlayıb; bu məhsulun əsasını təşkil edən bəzi ideyalar sonralar "Google" şirkəti tərəfindən "PageRank" sistemi üçün istifadə edilib.
Cənab Marçiorinin sözlərinə görə, "Volunia" tamamilə yeni xidmətdir. "Volunia" axtarış elementlərini sosial şəbəkə funksionallığı ilə əlaqələndirir. Xidmət, məsələn, eyni mövzu ilə bağlı informasiyanı axtaran digər istifadəçi ilə əlaqədə olmağa imkan verəcək. Xidmət ilk əvvəl qapalı beta-test rejimində işləyəcək. "Volunia" xidmətinin interfeysi 12 dildə təqdim edilib.