“Apple” şirkəti patent müharibəsindən bezmədi?

“Apple” şirkəti “Samsung Galaxy Nexus” smartfonunun ABŞ-da satışına qadağa qoyulması üçün Amerika məhkəməsinə ərizə ilə müraciət edib. “Apple” şirkəti rəqiblərin onun 4 patentinə olan hüquqlarını pozduqlarını bildirib. Bu barədə “Foss Patents” bloqunda qeyd edilib.

“Samsung Galaxy Nexus” smartfonu oktyabr ayının ortasında təqdim edilmiş “Google Android 4.0 Ice Cream Sandwich” əməliyyat sisteminin yeni versiyası ilə işləyən ilk qurğudur. Aparatı “Google” şirkətinin sifarişi ilə “Samsung” şirkəti hazırlayıb.

“Apple” şirkətinin qeyd etdiyi 4 patent proqram texnologiyalarına aiddir. Beləliklə, “Android 4.0” mobil əməliyyat sistemini öz qurğularına quraşdıracaq istehsalçılar, həmçinin belə problemlə üzləşə bilərlər.
Məlumat üçün qeyd edim ki, “Apple” və ”Samsung” şirkətləri arasında patent qarşıdurması 2011-ci ilin yazından davam edir. Şirkətlər bütövlükdə bir-birlərinə qarşı müxtəlif ölkə məhkəmələrinə 30-dan çox iddia veriblər.

EMİL