"Samsung" suyadavamlı və "ağıllı" telefon təqdim edib

"Samsung" şirkəti "Galaxy Xcover 2" "ağıllı" telefonunu təqdim edib. Qurğu "IP67" müdafiə dərəcəsinə malikdir və təxminən 30 dəqiqə müddətində 1 metrədək suyun altında qala bilər. Bu halda iş qabiliyyətini itirmir. Bu xüsusiyyətinə görə "Galaxy Xcover 2" sualtı fotolar çəkə bilir.

“ICTnews.az” elektron xəbər xidməti “tech.onliner.by” saytına istinadən bildirir ki, cihaz 1 QHs takt tezliyində işləyən ikinüvəli prosessor, 1 QB əməli yaddaş və 4 QB daxili yaddaş, "microSD", 5 meqapiksel təsvir ölçüsünə malik əsas kamera və əlavə "VGA" kamera ilə təchiz edilib. 4 düymlü ekranın təsvir ölçüsü 480×800 nöqtəyə bərabərdir. "Galaxy Xcover 2" batareyasının tutumu 1700 milliamper/saat təşkil edir. Cihaza "Android 4.1 Jelly Bean" əməliyyat sistemi quraşdırılacaq.

"Ağıllı" telefonun ölçüləri 130,5×67,7×11,9 millimetr, çəkisi 148 qram təşkil edir. "Samsung Galaxy Xcover 2" "ağıllı" telefonunun qiyməti haqqında məlumat verilməyib.

Emil Hüseynov

---