Dördnüvəli prosessorla təchiz edilmiş mikrokompüter təqdim olunub

Yaxın vaxtlarda "Android 4.1 Jelly Bean" əməliyyat sistemi ilə işləyən "Tronsmart MK908" adlanan miniatür kompüterin satışlarına başlanılacaq.

"ICTnews.az" elektron xəbər xidməti "compulenta.ru" saytına istinadən bildirir ki, fləş-brelok ölçüsündə qurğu 1,6 QHs takt tezlikli dördnüvəli "ARM Cortex-A9" arxitekturalı "Rockchip RK3188" prosessoru ilə təchiz edilib. Əməli və daxili fləş-yaddaşın həcmi müvafiq olaraq 2 və 16 QB təşkil edir; "MicroSD" kartları üçün slot mövcuddur.

"Bluetooth 4.0" və "Wi-Fi" simsiz rabitə adapterləri, "Mini USB" portu, "USB" və "HDMI" interfeysi var. Qurğunun çəkisi 50 qramdan azdır, ölçüsü 88×31,5×15,8 millimetrdir. Qiyməti 90 dollardır.

Emil Hüseynov

---