Rabitə və İnformasiya Texnologiyaları Nazirliyinin Azərmarka şirkəti Azərbaycan Respublikasında telefon rabitəsinin 130 illiyinə həsr edilən poçt markasını təqdim edib.
Nominal dəyəri 1 manat və 200 min nüsxədə buraxılan markanın üzərində telefon aparatı və Yer kürəsi ətrafında fırlanan süni peyk təsvir olunub. 130 il bundan əvvəl, 1881-ci il dekabrın 6-da Bakıda Nobel Qardaşları tərəfindən uzunluğu 6 kilometr olan ilk telefon xəttinin çəkilməsi ilə Azərbaycanda rabitənin yaranma tarixi başlanır.
Xatırladaq ki, Azərbaycan Prezidenti İlham Əliyevin 2 dekabr 2006-cı il tarixli sərəncamı ilə hər il dekabrın 6-da Azərbaycanda rabitə və informasiya texnologiyaları işçilərinin peşə bayramı qeyd edilir.