Rabitə və İnformasiya Texnologiyaları Nazirliyinin elektron xəbər xidməti

“Twitter” səsli şəxsi mesajlar funksiyasını sınaqdan keçirir


“Twitter” sosial şəbəkəsi səsli şəxsi mesajlarla mübadilə funksiyasını sınaqdan keçirməyə başlayıb. Yaponiya, Braziliya və Hindistanda bəzi istifadəçilərdə bu imkan əlçatan olub.

 

“ICTnews” Elektron Xəbər Xidməti “vesti.ru” saytına istinadən yazır ki, səsli mesaj göndərmək üçün artıq başlanmış dialoqa daxil olmalı və ya yeni dialoq yaratmalı, bundan sonra səs nişanına sıxmaq lazımdır. “Stop” düyməsini sıxmaqla səs yazısını bitirmək, həmçinin səsli mesajı göndərməzdən əvvəl onu dinləmək mümkündür.

 

Şirkətdən bildirilib ki, eksperimental funksiya istifadəçilərə söhbət vaxtı "özünü ifadə etmək üçün daha çox imkan" yaradacaq. “Android” və “iOS” əməliyyat sistemləri üçün “Twitter” mobil proqramında səsli mesajlar yazmaq, veb-versiyada isə yalnız həmin mesajları dinləmək mümkündür.

 

Emil Hüseynov






18/02/21    Çap et