Çində mikrobloq xidmətləri sürətlə populyarlaşır

Çin internet-infrastrukturunun informasiya mərkəzinin (CNNİC) hesablamalarına əsasən, 2011-ci ilin sonunda ölkədə mikrobloq  istifadəçilərinin sayı 250 milyonu ötüb.

Bu göstərici 2010-cu il ilə müqayisədə təxminən 300 faiz çoxdur. Belə ki, o zaman belə xidmətlərdən təxminən 63 milyon insan istifadə edirdi. Beləliklə, hal-hazırda Çin Xalq Respublikasının (ÇXR) 500 milyonluq veb-auditoriyasının yarısı mikrobloqlardan istifadə edirlər.

“CNNİC”, həmçinin qeyd edib ki, internet-kommunikasiyaların digər növlərinin populyarlığının azalması müşahidə edilir. Belə ki, elektron poçtdan  47,9 faiz veb-istifadəçi istifadə edir. 1 il əvvəl bu göstərici 54.6 faiz təşkil edib.  Forumlara 28,2 faiz veb-istifadəçi daxil olur.

2010-cu ildə isə bu göstərici 32.4 faizə bərabər idi. Bloq və onlayn gündəliklərin populyarlığı isə 64,4 faizdən 62,1 faizə qədər azalıb.
ÇXR-də “Sina” şirkətinin “Weibo” mikrobloq xidməti ən populyardır.

---