POÇT

Tarix:24/09/12

Azərbaycanda Ümumdünya Poçt İttifaqının yaranmasının 138-ci ildönümü münasibəti ilə geniş tədbirlər keçiriləcək

“Azərpoçt” MMC 9 oktyabr - Ümumdünya Poçt İttifaqının yaranmasının 138-ci ildönümü münasibəti ilə geniş tədbirlər həyata keçirəcək. Bu barədə “ICTnews” elektron xəbər xidmətinə müəssisənin baş direktor köməkçisi Elşad Nurəliyev məlumat verib.

Onun sözlərinə görə, əlamətdar gün münasibətilə 3 saylı Poçt Filialının Xətai rayonunda və Samux Poçt Filialının Burunqovaq poçt şöbələrinin yeni binalarının tikilərək istifadəyə verilməsi nəzərdə tutulub. Bundan başqa müəssisənin yerli filiallarında toplantı, inzibati binalarda, poçt şöbələrində və ətraf ərazilərdə səliqə-sahman, abadlıq yaradılması məqsədi ilə iməclik keçiriləcək.

Xatırladaq ki, beynəlxalq poçt mübadiləsinin mütəşəkkil qaydada həyata keçirilməsi hazırda planetimizin bütün poçt işçiləri tərəfindən peşə bayramı günü kimi qeyd edilən Ümumdünya Poçt İttifaqının (ÜPİ) yaranması ilə başlayıb.

ÜPİ-nin yaradılması barədə müqavilə 1874-cü ildə İsveçrənin Bern şəhərində keçirilmiş Beynəlxalq Poçt konqresində imzalanıb. İyirmidən çox ölkə nümayəndələrinin iştirakı ilə keçmiş konqresdə ÜPİ-nin ümumi prinsiplərini, üzvlərinin hüquq və öhdəliklərini müəyyənləşdirən əsas sənəd – Ümumdünya Poçt Konvensiyası qəbul edilib. Hazırda bu qurumda 200-ə yaxın ölkə təmsil olunur. Azərbaycan poçtu 1993-cü ildən ÜPİ-nin üzvüdür.

RƏVAN

Baxış sayı: 1086