ABŞ-ın "Amazon" şirkəti "Prime Air" servisi çərçivəsində alıcılara kiçik sifarişlərin çatdırılması üçün nəzərdə tutulan yeni pilotsuz uçan aparat təqdim edib. Bu barədə şirkətin bloqunda deyilir.
"ICTnews" Elektron Xəbər Xidməti "NEWSru" resursuna istinadən yazır ki, "Amazon" artıq bir neçə ildir kiçik dronlar vasitəsilə sifarişlərin çatdırılması ideyasını inkişaf etdirir. "Prime Air" servisi 2016-cı ildə Böyük Britaniyada test rejimində işə salınıb, layihə üzərində işin davam etdiyi illər ərzində isə şirkət mühəndisləri tərəfindən bir neçə müxtəlif konstruksiyalı dron ərsəyə gətirilib. Yeni pilotsuz uçan aparat böyük altıbucaqlı ramaya malik geksakopter şəklindədir. Onun səthi qaldırıcı güc yaratmağa və uçuşu stabilləşdirməyə imkan verən aerodinamik profilə malikdir. Həmçinin dronun yuxarı hissəsində ayrıca vertikal stabilizator yerləşir.
24 km məsafədə 2,3 kq ağırlığında yük çatdırmaq qabiliyyətinə malik dronun korpusunun əsas hissəsi ramanın mərkəzində quraşdırılıb. Aparat vertikal rejimdə uçur və enir, havada isə iki ön və arxa vintdə hərəkət qüvvəsi nisbətinin dəyişməsi sayəsində horizontal uçuş rejiminə keçir.
"Amazon" şirkəti bağlamaların çatdırılması üçün yeni dronlardan bir neçə ay sonra istifadəyə başlamağı planlaşdırır.
Nizam Nuriyev