XƏBƏRLƏR

Tarix:04/05/12

ADU-da “Dil tədrisində innovativ metodikaların tətbiqi” mövzusunda konfrans keçiriləcək

Mayın 5-də Azərbaycan Dillər Universitetində (ADU) Təhsil Nazirliyi, Azərbaycan Dillər Universiteti, “Microsoft Azərbaycan” və “Mədəd Azərbaycan” şirkətlərinin təşkilatçılığı ilə “2008-2012-ci illərdə Azərbaycan Respublikasının təhsil sisteminin informasiyalaşdırılması üzrə Dövlət Proqramı” çərçivəsində “Dil tədrisində innovativ metodikaların tətbiqi” mövzusunda konfrans keçiriləcək.

Konfransın məqsədi dünya təcrübəsinə əsaslanaraq xarici dil tədrisində innovativ metodikaların tətbiqi proseslərini müzakirə etmək və Azərbaycanda bu istiqamətdə mövcud praktikanı təhsil sektorunun müzakirəsinə verməkdir. “İCTnews” elektron xəbər xidmətinə bu barədə ADU-nun mətbuat xidmətindən məlumat verilib.

Universitetdən bildirilib ki, konfransda ADU-nun rektoru, millət vəkili, professor Səməd Seyidovun “Azərbaycan Dillər Universitetində yeni metodologiyaların tətbiqi: təcrübə və perspektivlər”, Təhsil Nazirliyinin Təhsil sisteminin informasiyalaşdırılması idarəsinin rəisi Samir Məmmədov “Təhsil Sisteminin İnformasiyalaşdırılması üzrə Dövlət Proqramında Ali Pedaqoji Təhsil”, “Microsoft Azərbaycan” şirkətinin baş direktoru Rüfət Hacıbəylinin isə “Microsoft”un təhsil layihələri” mövzusunda çıxışları nəzərdə tutulur.

Konfrans çərçivəsində müzakirələr müasir pedaqoji və informasiya texnologiyalarının dil tədrisində tətbiqi və XXI əsr bacarıqlarının ali pedaqoji təhsildə tətbiqi mövzularında keçiriləcək. Müzakirələr zamanı xarici dil tədrisində layihə metodikasının daha geniş istifadəsi, xarici dil tədrisində informasiya texnologiyalarının daha geniş istifadəsi və müəllimlər arasında təcrübə mübadiləsi uçun mühit yaradılmasına xüsusi toxunulacaq.

“Müasir pedaqoji və informasiya texnologiyalarının dil tədrisində tətbiqi” mövzusunda müzakirələr zamanı Avropa Təhsildə Əməkdaşlıq Forumunun qaliblərindən olan ADU-nun dosenti Gülbəniz Camalova və Bakı şəhər 55 saylı orta məktəbin müəllimi Nailə Həsənovanın birgə əməkdaşlığına xüsusi diqqət ayrılacaq. Hər iki pedaqoq “Fransız dilinin tədrisində layihə metodundan istifadə”dən, “Mədəd Azərbaycan” təşkilatının direktoru Vüsal Xanlarov isə “Pedaqoji işçilərin peşəkarlıq səviyyəsinin artırılması layihələri”ndən bəhs edəcəklər.

ADU-dan vurgulanıb ki, bu pedaqoqların Avropa Təhsildə Əməkdaşlıq Forumunda birgə təqdim etdikləri "Gəlin planetimizi birlikdə qoruyaq" tədris layihəsi “Sinifdənkənar tədris” (Extending Learning beyond the Classroom) nominasiyası üzrə III yerə layiq görülüb.

Konfrans qruplarda “İnnovativ pedaqoji və informasiya texnologiyalarının dil tədrisində tətbiqi” və “XXI əsr bacarıqların tədris praktikasının ali pedaqoji təhsildə tətbiqi” mövzularında aparılacaq müzakirələrlə yekunlaşacaq.

HƏQİQƏT

Baxış sayı: 3746