XƏBƏRLƏR

Tarix:05/06/12

Elektronika mağazası yalan reklamlardan istifadə edib

Bakı şəhəri, Nəsimi rayonu, H.Seyidzadə küçəsi, ev 13 ünvanında “ABC-Telekom” MMC-yə məxsus “Kontakt Electronics” mağazasında aparılan yoxlama zamanı bilərəkdən yalan və qeyri-dəqiq reklamlardan istifadə edilməklə istehlakçıların aldadıldığı müəyyən edilib.

Belə ki, paytaxtın ayrı-ayrı küçələrində yerləşən reklam daşıyıcılarında istehlakçıda “Kontakt Electronics” mağazasında dəyərindən asılı olmayaraq satılan hər bir mala görə hədiyyə verilməsi təəssüratı yaradan “Kontakt Electronics, Al! Hədiyyə Al!” mövzulu reklamlar yayımlanıb.

Halbuki faktiki olaraq, mağazada 200 manatdan aşağı qiymətə mal almış istehlakçılara heç bir hədiyyə verilmədiyi aşkarlanıb. Bu barədə “İCTnews” elektron xəbər xidmətinə İqtisadi İnkişaf Nazirliyinin (İİN) mətbuat xidmətindən məlumat verilib.

Nazirlikdən qeyd edilib ki, bilərəkdən yalan və qeyri-dəqiq reklamların yayımının dayandırılması məqsədilə İİN yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən Bakı Şəhər Reklam və İnformasiya İdarəsinə göstəriş verilib: “İstehlakçılardan saxta reklam kampaniyaları ilə rastlaşdıqda, İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin 498-15-01 və 498-15-04 əlaqə telefonlarına müraciət etmələri xahiş olunur. Hazırda bu istiqamətdə araşdırmalar davam edir”.

HƏQİQƏT

Baxış sayı: 951