XƏBƏRLƏR

Tarix:08/06/12

YARAT!-dan “Bakcell ulduzu” hədiyyəsi

Azərbaycanın ilk mobil operatoru və aparıcı internet provayderi “Bakcell” şirkəti “YARAT!” təşkilatı tərəfindən 15 may – 15 iyun tarixləri arasında keçirilən “Birləşən Körpülər” adlı sərginin telekommunikasiya tərəfdaşı olub. Sərgi çərçivəsində “Bakcell”ə həsr edilmiş xüsusi gün təşkil edilib. Tədbirdə “YARAT!”-ın rəhbəri Aida Mahmudova, “Bakcell”in baş icraçı direktoru Riçard Şirer, həmçinin şirkətin korporativ müştəriləri və tərəfdaşları iştirak edib.

“Bakcell”in yaradıcı insanlara göstərdiyi dəstəyə təşəkkür əlaməti olaraq sərgidə Azərbaycanın kreativ rəssamlarından biri Rəşad Ələkbərovun “Bakcell” sözünü təşkil edən hərflərlə şirkətin rəmzi olan ulduz işarəsinin instalyasiyası nümayiş olunub.

“Bakcell”ə həsr olunmuş xüsusi gündə rəssam “Bakcell ulduzu” adlı instalyasiyanı şirkətə hədiyyə edib. O deyib ki, bu hədiyyə öz abunəçilərinə və eyni zamanda gənc rəssamlara və müasir incəsənətin inkişafına göstərdiyi qayğı üçün təşəkkürdür.

“YARAT!”-ın təsisçisi Aida Mahmudova isə təşkilatın “qızıl tərəfdaşlıq” kartını “Bakcell” rəhbərliyinə təqdim edib.

“Bakcell”in baş icraçı direktoru Riçard Şirer isə bildirib ki, rəhbərlik etdiyi şirkət müasir incəsənətin inkişafına dəstək göstərməkdən məmnunluq duyur: “Birləşən Körpülər” sərgisi Azərbaycanda müasir incəsənətin inkişafına və onun dünyaya tanıdılmasına böyük töhfədir.

Burada dünyanın müxtəlif yerlərindən olan rəssamların öz əsərlərini nümayiş etdirməsi isə müasir incəsənətlə məşğul olan rəssamlar üçün unikal bir imkandır”.

Baxış sayı: 959