XƏBƏRLƏR

Tarix:02/07/12

İndiyədək Sumqayıtda “Təhlükəsiz şəhər” sistemi üzrə 85 kamera quraşdırılıb

İndiyədək Sumqayıt şəhərinin müxtəlif küçə və prospektlərində, mərkəzi park və xiyabanlarda “Təhlükəsiz şəhər” sisteminin 85 kamerası quraşdırılıb.

Respublika prezidentinin elmi-texniki tərəqqinin ən son nailiyyətlərinin daxili işlər orqanlarında tətbiqinə, onların zəruri avadanlıq və texnika ilə təchizatına böyük diqqət yetirməsi sayəsində bu gün Daxili İşlər Nazirliyi (DİN) ən müasir tələblərə cavab verən texniki və xüsusi vasitələrlə təmin olunub.

“ICTnews” elektron xəbər xidmətinə bu barədə DİN-in Mətbuat xidmətindən məlumat verilib. Nazirlikdən bildirilib ki, Azərbaycan polisinin peşə bayramı ərəfəsində paytaxtın Nizami rayon və Sumqayıt şəhər polis idarələrinin yeni inzibati binalarının açılışı olub. Hər iki tədbirdə Azərbaycan Respublikasının daxili işlər naziri, general-polkovnik Ramil Usubov iştirak edib.

Nazirlikdən qeyd edilib ki, Nizami rayonunda tikintisinə ötən ilin aprelində başlanmış beşmərtəbəli inzibati bina bütün zəruri avadanlıq, inventar və kommunikasiyalarla təmin edilib. Binada mərkəzləşdirilmiş split tipli kondisioner, ventilyasiya, mərkəzi istilik sistemi və qazanxana, rabitə-kommunikasiya və digər mühəndis qurğular tikilib.

HƏQİQƏT

Baxış sayı: 2625