XƏBƏRLƏR

Tarix:10/07/12

Yarımkeçirici mikrosxem bazarının həcmi azalıb

Yarımkeçirici Sənaye Assosiasiyasının (SIA) hesablamasına görə, 2012-ci ilin mayında yarımkeçirici mikrosxem bazarının həcmi təxminən 24,39 milyard dollar təşkil edib. Müqayisə üçün qeyd edək ki, bu göstərici apreldə 24.07 milyard dollara bərabər olub və artım 1.4 faiz təşkil edib.

Lakin illik hesablamada yarımkeçirici mikrosxemlərin tədarükü 3.4 faiz azalıb. Belə ki, 2011-ci ilin mayında 25.24 milyard dollar həcmində məhsul satılıb.

“ICTnews.az” elektron xəbər xidməti “compulenta.ru” saytına istinadən bildirir ki, yarımkeçirici məhsula tələbatın azalması, demək olar ki, bütün regionlarda müşahidə olunub. Məsələn, ABŞ-da satış həcmi 3.2 faiz azalaraq 4.48 milyard dollar təşkil edib.

Avropa bazarında satış həcmi 13.6 faiz azalıb: əgər 1 il əvvəl 3.29 milyard dollar həcmində yarımkeçirici məhsul satılmışdısa, hazırda bu göstərici 2.84 milyard dollara bərabərdir. Asiya-Sakit okean regionunda tədarük həcmi 1.9 faiz azalaraq 13.71 milyard dollara bərabər olub.

Analitiklərin fikrinə görə, 2012-ci ilin sonuna kimi yarımkeçirici mikrosxemlər bazarında aylıq hesablama üzrə cüzi artım müşahidə olunacaq.

EMİL

Baxış sayı: 945