MARAQLI

Tarix:11/10/12

Azərbaycan süni peykini kosmosa qaldırdıqdan sonra defektoskopiya sahəsinə tələbat artacaq

Azərbaycan süni peykini kosmosa qaldırdıqdan sonra defektoskopiya sahəsinə tələbat artacaq. “ICTnews” elektron xəbər xidmətinə bu barədə Bakı Metropolitenindən (BM) məlumat verilib. BM-dən bildirilib ki, defektoskopiya metronu təkcə fəlakətlərdən qorumur: “Metropolitendə yolların təhlükəsizliyində defektoskopiya sahəsinin fəaliyyəti xüsusi qeyd edilməlidir. Metropolitenin ən əsas vəzifəsi olan təhlükəsiz daşınmanın birinci təminatçıları defektoskopçulardır.

İlk baxışda elə görünür ki, defektoskopçular yollarda olan çatışmazlıqları müəyyən edir, bu barədə yekun qənaəti bildirir və bunun əsasında problemlər aradan qaldırılır. Əslində, defektoskopçuların həll edə biləcəyi məsələlər bununla bitmir. Onlar 3 əsas məsələyə müdaxilə edə - istehsalçının və istehlakçının, yəni istismarçının buraxdığı nöqsanların aradan qaldırılmasına böyük təkan verə bilərlər”.

Qurumdan qeyd edilib ki, postsovet məkanı və yaxın ölkələrin metropolitenlərindəki defektoskopiya sahəsi üzrə ən güclü mütəxəssislər məhz Bakı Metropolitenindədir: “Amma əsas problem metropolitençi mütəxəssislərin gördüklərini kağız üzərinə köçürə, sənədləşdirə və izah edə bilməməsidir. Bununla yanaşı, başqa metropolitenlərdə defektoskopçuların hazırlıq prosesinə Azərbaycandakı kimi diqqət yoxdur. Defektoskopçuların təhlükəsizliyə hazırlıq səviyyəsi MDB-də ən yüksək göstərici kimi 80 faiz civarındadır.

Lakin səviyyəni bir qədər də artırmaq, ən əsası onu “düşünən işçi” həddinə gətirmək lazımdır. Məsələn, problemləri relslər sahəyə daşınıb yola qoyulmazdan əvvəl müəyyən etmək olar”. Hər bir relsin yerləşdiriləcəyi sahəni də defektoskopçular müəyyən edə bilər: “Bu isə heç də sonuncu məsələ deyil. Onun xeyri düşündüyümüzdən də çoxdur. Ultrasəsin sürətini müəyyən edən cihazlarımız var. Müəyyən müşahidələr apardıqdan sonra relsin keyfiyyətinə qiymət vermək olar. Hər bir sahədə qatarın təyin edilmiş sürəti var.

Bunu bilərək defektoskopçular relsin qoyulacağı yeri asanlıqla təyin edə bilərlər”. Qiymətləndirmələrə əsasən, relslərin müxtəlif sahələrdə keyfiyyətinə görə düzgün yerləşdirilməsi metroya iqtisadi və istismar səmərəsi vermək, qənaət etmək imkanı yaradacaq: “Bu isə birbaşa həm defetoskopçuların, həm də digər sahələrdə çalışanların əmək haqlarının artırılması, əmək şəraitinin yaxşılaşdırılması, sosial mühitin yaxşılaşması üçün münbit zəmin deməkdir.

Bununla yol ustalarının işi daha da asanlaşmaqla, bir çox texniki problemlər aradan qalxacaq və əsas diqqət fərqli istiqamətə yönələcək. Eyni zamanda ümumilikdə işə yanaşma tərzi dəyişəcək, həmçinin bununla relslərin istismar müddəti də uzadılmış olacaq”. Ümumiyyətlə, metropolitenin mütəxəssisləri hesab edirlər ki, rasional yanaşma sayəsində ildən-ilə, cəmi 2-3 il ərzində vəziyyəti tam düzəltmək olar: “Bundan sonra isə defektoskopçular keyfiyyəti təmin edərək daha faydalı və səmərəli işlə məşğul ola bilərlər. Yekunda, defektoskopçular yaxın 5 il ərzində, Avstriyadakı kimi, dördgünlük iş rejiminə də keçə bilərlər”.

HƏQİQƏT

Baxış sayı: 767