PROQRAM TƏMİNATI

Tarix:08/01/13

Əməliyyat sistemləri bazarında hansı şirkət liderdir?

"Net Applications" monitorinq şirkətinin 2012-ci ilin dekabrına olan məlumatına əsasən, "Windows" əməliyyat sistemi (ƏS) qlobal bazarda ən populyar ƏS olaraq qalır. Belə ki, "Windows" ailəsi ƏS-nin payı 91,74 faiz təşkil edir. Ötən ayla müqayisədə bu göstərici 0,29 faiz çoxdur.

"ICTnews.az" elektron xəbər xidməti "itc.ua" saytına istinadən bildirir ki, "Mac" platformasının ƏS-i populyarlığa görə ikinci yerdə qərarlaşıb: dekabrda onun bazar payı 7,07 faizə bərabər olub. 1.19 faiz göstəriciyə malik "Linux" ƏS-i isə üçüncü olub. Qeyd edək ki, bir ay ərzində onun bazar payı 0,06 faiz azalıb. "Windows" ailəsinə gəlincə isə "Windows 7" versiyası daha populyardır: dekabrda onun bazar payı 0,40 faiz artaraq ilk dəfə 45 faiz səddini keçib. Sonrakı yerdə artıq köhnəlmiş, lakin hələ populyar "Windows XP" qərarlaşıb.

Dekabrda bu əməliyyat sisteminin bazar payının azalmasına baxmayaraq, o, 39,08 faiz kompüterdə hələ də istifadə olunur. "Windows Vista"nın bazar payı isə 5,67 faizə bərabərdir. Yeni istifadəyə verilmiş "Windows 8" ƏS-nin bazar payı hələ ki 1,77 faizdir.

Müqayisə üçün qeyd edək ki, noyabrın sonunda bu göstərici 1,11 faiz təşkil edirdi. "Windows"un daha köhnə versiyaları 0,11 faiz kompüterdə hələ də istifadə olunur.

Emil Hüseynov

Baxış sayı: 999