PROQRAM TƏMİNATI

Tarix:25/07/13

Azərbaycan proqramçıları “iPad” üçün yeni əlavə tərtib ediblər

Azərbaycanın "Simbrella Baku LLC" şirkəti "iPad" planşetləri üçün yeni əlavə tərtib edib. Şirkətdən "ICTnews" xəbər xidmətinə verilən məlumata əsasən, Azərbaycan proqram tərtibatçılarının yaratdığı yeni əlavə artıq "iTunes" mobil proqramlar dükanında təqdim edilib.

"Yeni əlavə Azərbaycanın tarixi abidələri və arxitekturası ilə tanış olmaq istəyən səyahətçilər və turistlər üçün nəzərdə tutulub. Proqram ölkənin tarixi abidələri və digər diqqətə layiq yerləri haqda ətraflı məlumat, orijinal şəkillər, mətnlər və rəsmlər təqdim edir.

Proqramda Şərq mədəniyyəti üzrə mütəxəssis və peşəkar arxitektor Elçin Əliyevin hazırladığı şəkillər və mətnlər və Azərbaycanın tanınmış rəssamı Nüsrət Hacıyevin rəsmləri təqdim edilib. Əlavə sadə və aydın interfeysə və tətbiq edilmiş naviqasiyalı xəritəyə malikdir. Bütün məlumatlarla ingilis, Azərbaycan və rus dillərində tanış olmaq olar.

"Hazırda bizim proqram tərtibatçılarımız bu əlavənin "Android" üzərində işləyən mobil qurğular üçün hazırlanması istiqamətində işlər həyata keçirirlər və yaxın zamanda bu qurğuların istifadəçiləri də yeni proqramdan istifadə edə biləcəklər", - deyə şirkətdə bildiriblər.

Aynur Vəliyeva

Baxış sayı: 966