XƏBƏRLƏR

Tarix:22/08/13

İlk peşə-ixtisas təhsili müəssisələrində təhsil almaq istəyənlər bu tədris ilindən sənədlərini onlayn rejimdə təqdim edəcəklər

Təhsil Nazirliyi yeni tədris ilini bir sıra yeniliklərlə başlayacaq. Belə ki, bu tədris ilindən başlayaraq, ilk peşə-ixtisas təhsili müəssisələrində təhsil almaq istəyən şəxslər sənədlərini onlayn rejimdə təqdim edə biləcəklər. Bu proses “www.psds.edu.az” saytı vasitəsilə aparılacaq. Eyni zamanda qeyd olunan sayt vasitəsilə həm ilk peşə-ixtisas təhsili müəssisələri, həm də peşələr və qəbul qaydaları haqqında məlumat əldə etmək mümkün olacaq.

Nazirlikdən bildirilib ki, yeni dərs ilinə II, IV, VI, VIII, IX və XI siniflər üçün 139 adda 4011000 nüsxə dərslik və müəllim üçün metodik vəsait dövlət vəsaiti hesabına çap edilərək ümumtəhsil məktəblərinin istifadəsinə veriləcək: “VI sinif dərslikləri ilk dəfə olaraq kurikulum əsasında hazırlanıb.

IX sinfin “Alman dili” dərsliyi də yeni dərslikdir. Digər dərsliklər əvvəlki nəşrlər üzərində redaktə işi aparılmaqla çap olunub. Yeni təhsil proqramlarının (kurikulumlar) VI siniflərdə də tətbiqi ilə əlaqədar müəllimlərin hazırlığına başlanılmışdır. Yeni dərs ilində təlimin keyfiyyəti ilə bağlı monitorinqlərin aparılmasına xüsusi diqqət yetiriləcək, nəticədən asılı olaraq müvafiq təkliflər hazırlanacaq.

Yeni dərs ili üçün yeniliklərdən biri də ondan ibarətdir ki, ilk dəfə olaraq özəl ilk peşə-ixtisas təhsili müəssisəsi olan Bakı Sahibkarlıq Peşə Məktəbinə qəbul aparılacaq”. Bundan başqa, yeni tədris ilində Təhsil Nazirliyi bir sıra qurumlarla, o cümlədən, işəgötürən təşkilatlarla kadr hazırlığı istiqamətində birgə layihələr həyata keçirəcək.

Belə ki, Bakı şəhərində yerləşən bir neçə ilk peşə-ixtisas təhsili müəssisəsində tanınmış şirkətlərlə birgə və beynəlxalq əməkdaşlıq çərçivəsində Resurs Mərkəzlərinin yaradılması, eləcə də müvafiq kursların təşkili nəzərdə tutulur. Yeni dərs ilində orta ixtisas təhsili müəssisələri üçün 13 adda 17800 nüsxə dərslik, dərs vəsaiti və metodik vəsait (elektron versiyaları ilə birgə) ilk dəfə olaraq hazırlanıb, nəşr edilib və orta ixtisas təhsili müəssisələrinə paylanacaq.

Yeni dərs ili ərəfəsində ali və orta ixtisas təhsili müəssisələrinin şəbəkəsi genişləndirilib. Belə ki, İnformasiya Texnologiyaları Universiteti və İsmayıllı Dövlət Humanitar və Texnologiya Kolleci yaradılıb, qəbul planı müəyyənləşdirilib. Növbəti dərs ilindən həmin təhsil müəssisələrində tədrisə başlanacaq.

Həqiqət İSABALAYEVA

Baxış sayı: 936