XƏBƏRLƏR

Tarix:24/09/14

Hindistan Marsı tədqiq edəcək

Hindistanın Marsın tədqiqi üçün nəzərdə tutulan "Mangalyaan" planetlərarası avtomatik stansiyası uğurla planet orbitinə çıxarılıb. Bu barədə Hindistan Kosmik Tədqiqatlar Təşkilatı (ISRO) məlumat verib.

Hindistan stansiyanı Mars orbitinə ilk cəhdə çıxaran dünyanın ilk dövləti və Asiyanın bu uğura nail olan ilk ölkəsi olub.

Banqalor şəhərində yerləşən Uçuşların İdarəetmə Mərkəzində əməliyyata Hindistan baş naziri Narenda Modi tamaşa edib. "Bu gün tarixi hadisə baş verib. Biz qeyri-müəyyənliyə yola düşmək qərarına gəldik və demək olar, qeyri-mümkün bir şeyə nail olduq. Mən bütün "ISRO" alimlərini, eləcə də soydaşlarımı bu tarixi hadisə münasibətilə təbrik edirəm", - baş nazir qeyd edib.

5 noyabr 2013-cü ildə buraxılan "Mangalyaan" beş cihazla təchiz edilib və vəzifəsi Mars səthinin öyrənilməsindən ibarətdir. Hindistan missiyanın həyata keçirilməsinə 74 milyon dollar vəsait xərcləyib ki, bu da Marsa edilən son ekspedisiyaların ən ucuz başa gələnidir, - "Lenta"yazır.

Baxış sayı: 1187