PROQRAM TƏMİNATI

Tarix:27/07/15

“Windows 10” FK bazarında tələbatı artıra bilməyəcək

Yeni "Windows 10" əməliyyat sisteminin satışa çıxarılması üzrə rəsmi starta bir neçə gün qalır. Analitiklər əmindirlər ki, bu məhsul kompüter sahəsini yenidən zirvəyə qaytara bilməyəcək.

"IDC" tədqiqat agentliyinin proqnozuna görə, "Windows 10" (29 iyul 2015-ci ilə nəzərdə tutulmuş) pərakəndə satışına start verildikdən 12 ay sonra qlobal fərdi kompüter bazarının həcmi 2 faiz azalacaq. Müqayisə üçün qeyd edək ki, "Windows 7" platformasının çıxışından sonrakı birinci ildə FK sahəsi 18 faizlik artım nümayiş etdirib.

"ICTnews" elektron xəbər xidməti "dailycomm.ru" saytına istinadən bildirir ki, "Windows 10" sistemində "Başlat" menyusu geri qaytarılıb, "Internet Explorer" brauzeri yeni "Edge" proqramı ilə əvəzlənib, yeni "Cortana" səs köməkçisi quraşdırılıb və parolların daxili üzrə ənənəvi metodların əvəzinə sifətin tanınması və barmaq izi texnologiyası meydana çıxıb. Ancaq ekspertlər "Windows 10" sisteminin yüksək populyarlığını gözləmirlər.

"IDC" şirkətinin məlumatına əsasən, 2011-ci ildə 363,8 milyon FK satılıb. O vaxtdan sözügedən bazarın həcmi azalıb və 2014-cü ildə 308,2 milyon təşkil edib.

Emil Hüseynov

Baxış sayı: 761