PROQRAM TƏMİNATI

Tarix:09/10/15

2016-cı ildə daktiloskopik sensorlar “Android” sistemli smartfonlarda geniş tətbiq ediləcək

2016-cı ildən etibarən "Android" mobil əməliyyat sisteminin idarəetməsi ilə işləyən smartfon istehsalçıları qurğularda əl barmağı izlərinin oxunması üçün sensorların geniş tətbiqinə başlayacaq.

Bildirilir ki, smartfonlarında daktiloskopik sensorların istifadə olunduğu "Apple" və "Samsung" şirkətlərindən nümunə götürən Çinin əksər "Andoid" model istehsalçıları bu funksiyanı qurğuların spesifikasiyasına daxil edəcəklər.

Bunu nəzərə alaraq növbəti ildə Çin istehsalçıları tərəfindən "Google" şirkətinə məxsus mobil platforma bazasında buraxılacaq smartfonların 30-40 faizinin bu sensorla təchiz edilməsi gözlənilir. Hazırda Çin istehsalı olan "Android" sistemli qurğular arasında istifadəçinin barmaq izinə görə tanınması texnologiyasının tətbiqi səviyyəsi 10-15 faiz qiymətləndirilir.

Bununla yanaşı, bazarda daktiloskopik sensorların qiymətinin azalması və sensor istehsalçıları arasında rəqabətin güclənməsi müşahidə ediləcək.

"Tractica" analitik şirkətinin proqnozuna görə, 2021-ci ilədək daktiloskopik sensorlarla təchiz edilən qurğuların tədarük həcmi 1 milyard ədədi ötəcək. Qeyd olunan müddətədək bazara çıxarılan planşet və smartfonların 34 faizinin belə sensorlarla təchiz edilməsi nəzərdə tutulur, - "DailyComm" yazır.

Baxış sayı: 729