XƏBƏRLƏR

Tarix:26/10/15

“İKT-nin təhsildə tətbiqi, səviyyə 2” təlimi başlayır

28 oktyabr tarixində yenicə istifadəyə verilmiş İTE təlim mərkəzində “İKT-nin təhsildə tətbiqi, səviyyə 2” təliminə start veriləcək. Təlimlər təhsil müəssisələrinin pedaqoji və inzibati-idarəetmə heyəti, həmçinin təhsil sahəsində çalışmaq istəyən pedaqoji universitet tələbələri və məzunları üçün nəzərdə tutulub.

Təlimdə iştirak etmək istəyənlər baza biliklərinin yoxlanılması üçün diaqnostik qiymətləndirmədən keçməlidirlər. İTE-dən qeyd edilib ki, bu təlimlər “İKT-nin təhsildə tətbiqi, səviyyə 1” təlimində iştirak etmiş müdavimlərə şamil olunmur.

Təlim iştirakçıları “MS Office” proqramlarının imkanlarından istifadə edərək tədris məhsullarını hazırlamaq; təhsildə internet xidmətlərinin əhəmiyyətini və rolunun izahı, axtarış saytlarından, elektron poçtdan istifadə qaydalarını öyrənəcək, təhsildə bloqların rolunu öyrənərək, fənni ilə bağlı bloqlar yarada biləcək, eyni zamanda “Web 2” alətlərindən istifadə etməklə onlayn şəraitdə testlər, təqdimatlar, oyunlar və s. resurslar hazırlayacaqlar. Təlimdə xüsusi bonus da nəzərdə tutulur. Belə ki, təlimdə iştirak edən hər kəs yüksək keyfiyyətli təlim materiallarını kitab şəklində əldə edəcək, bu kitabın köməyi ilə biliklərini birbaşa işlərində istifadə edib, tətbiq edə biləcəklər.

Qeyd edək ki, təlimlər “Təhsildə İnnovativ Texnologiyalar” əlavə təhsil mərkəzi tərəfindən aparılır. Mərkəzin fəaliyyəti Təhsil Nazirliyi tərəfindən lisenziyalaşdırılıb. Təlimlər peşəkar təlimçi tərəfindən keçirilir. Təlim proqramı beynəlxalq təcrübə və yeni tədris texnologiyalarından istifadə etməklə hazırlanır.

Təlimlər yerli və beynəlxalq aparıcı qurumlarla əməkdaşlıq nəticəsində daim yenilənən təlim proqramları əsasında keçirilir. Təlimin sonunda “Təhsildə İnnovativ Texnologiyalar” əlavə təhsil mərkəzi tərəfindən sertifikat təqdim ediləcək.

Həqiqət İSABALAYEVA

Baxış sayı: 1132