XƏBƏRLƏR

Tarix:30/06/16

Mobil proqram videogörüntüdə arzuolunmaz obyektləri gizlətməyə imkan verir

ABŞ-ın Dyuk Universitetinin alimləri smartfonda arzuolunmaz obyektlərin görüntülənməsinin qarşısını alan mobil proqram hazırlayıblar.

"ICTnews" Elektron Xəbər Xidməti "naked-science.ru" saytına istinadən xəbər verir ki, mobil proqramı işə salmış istifadəçi ayrı-ayrı obyektlərin görüntülənməsini özü təyin edir. Sözügedən texnologiya ikiölçülü (lövhə, proyektor ekranları) və üçölçülü səth (klaviatura, sifət) rejimlərində işləyir.

Görüntülənməsinə icazə verilmiş obyektlərin təsbitindən sonra mobil proqram real vaxt rejimində kompüter görüntüsü vasitəsi ilə daxil olan videoaxını skan edir. Həmsöhbətin ekranında yalnız görüntülənməsinə icazə verilmiş təsvir göstərilir, qalan sahələr isə qaraldılır.

Alimlər sınaq rejimində sözügedən proqramı "Android" əsaslı smartfonlarda sınaqdan keçiriblər. Məlumata görə, aktivləşdirilmiş funksiya videonun sürət və effektivliyinə təsir göstərməyib.

Hərəkət edən obyektlərin video qeydiyyatında, həmçinin gecikmə qeydə alınmayıb.

Emil Hüseynov

Baxış sayı: 815