XƏBƏRLƏR

Tarix:16/08/16

Külək vasitəsilə smartfonları enerji ilə dolduran qurğu nümayiş olunub

Mobil cihazları enerji ilə doldurmaq üçün günəş enerjisindən istifadə edən enerjidoldurma qurğuları telefonların avtonom iş müddətini artırmaq üçün əla üsuldur. Ancaq sözügedən elektrik enerjisi mənbəyi günün vaxtından və günəş işığının intensivliyindən çox asılıdır. Buna görə dizayner Nils Ferber tərəfindən mobil qurğular üçün hazırlanmış yeni enerji mənbəyi elektrik enerjisinin hasili üçün küləkdən istifadə edir.

"ICTnews" Elektron Xəbər Xidməti naked-science.ru saytına istinadən yazır ki, dizayner uzun müddət külək enerjisindən elektrik enerjisi hasili üzrə ən səmərəli alət yaratmağa imkan verən müxtəlif qurğu və komponentləri araşdırıb.

Elektrik enerjisinin hasili üçün külək enerjisindən istifadə edən açılıb-bağlanan turbin "Micro Wind" adlanır. Dizayner belə qurğuların bazarda mövcudluğunu inkar etmir, ancaq onun sözlərinə görə, heç bir sistem belə ölçü, həmçinin sadəlik, yığcamlıq və effektivliyə malik deyil.

Yeni enerji mənbəyi qurğusunun çəkisi 1 kq-dan azdır. Bir neçə komponentdən ibarət olan sadə sistem bir neçə saniyə ərzində qurula bilər. "Micro Wind" turbinin əsas özəlliyi gecə-gündüz işləyə bilmək imkanıdır.

Aydındır ki, çıxış gücü küləyin sürətindən asılıdır və istehsalçı bildirib ki, küləyin sürəti 18 km/saat olduqda turbin 5 vatt daimi çıxış gücü əldə edir.

Dizayner öz qurğusunu təkmilləşdirdikdən sonra bazara çıxarmağı planlaşdırır.

Emil Hüseynov

Baxış sayı: 858