XƏBƏRLƏR

Tarix:05/12/16

“WhatsApp” ilin sonunadək köhnə qurğuların dəstəklənməsini dayandıracaq

Populyar “WhatsApp” messencerinin tərtibatçıları bu ilin sonunadək servisin köhnə qurğuları dəstəkləməsini dayandıracağını bir daha xatırladıblar. Bu barədə ilk dəfə ilin əvvəlində elan edilsə də, bəzi istifadəçilərin bundan xəbərsiz ola bilməsi ehtimal edilir.

“ICTnews” Elektron Xəbər Xidməti “4PDA” resursuna istinadən yazır ki, 2017-ci ildən etibarən “Android 2.1” və “Android 2.2”, “Windows Phone 7.1” və “iOS 6” (və ya iPhone 3GS) əməliyyat sistemlərinin idarəetməsi ilə işləyən qurğu sahibləri servisdən yararlana bilməyəcəklər. Əvvəlcə bu siyahıda “Nokia S40”, “Nokia Symbian S60”, “BlackBerry 10” və “BlackBerry OS” sistemləri olsa da, şirkət sonradan onların dəstəklənməsini 30 iyun 2017-ci ilədək uzatmaqla bağlı qərar qəbul edib.

Məlumata görə, köhnə qurğuların dəstəklənməsinin dayandırılması onların tərtibatçıların messencerə əlavə etdikləri yeni funksiyalarla uyğun gəlməməsi ilə əlaqədardır.

Qeyd edək ki, son vaxtlar xidmətdə bir çox yeniliklər, o cümlədən ikifaktorlu autentifikasiya sistemi, videozənglərin dəstəklənməsi, fotoşəkillər üçün stikerlər, statuslar, çatlar üzrə axtarış, qruplara istinadlar və s. istifadəyə verilib.

Nizam Nuriyev

Baxış sayı: 608