XƏBƏRLƏR

Tarix:08/12/16

“Euronews” telekanalı “Bakutel 2016” sərgi və konfransı haqqında reportaj təqdim edib

Tanınmış "Euronews" telekanalı "Bakutel 2016" 22-ci Azərbaycan Beynəlxalq Telekommunikasiya və İnformasiya Texnologiyaları Sərgi və Konfransı haqqında ətraflı reportaj hazırlayıb.

Süjetdə qeyd olunur ki, regionun ən böyük sahəvi tədbirlərindən biri olan "Bakutel" sərgisi 20 ildən artıqdır ki, hər il telekommunikasiya sahəsinin aparıcı iştirakçılarını bir araya toplayır. İnformasiya texnologiyaları üzrə məhsul və xidmətlərin nümayiş olunduğu əsas meydança kimi, "Bakutel" sərgisi möhkəm əlaqələrin qurulduğu və yeni müəssisələrin təsis olunduğu başlıca biznes-platformaya çevrilib.

Sərgidə təqdim edilən texnoloji yeniliklər barədə söz açan videomaterialda sərgi ilə tanış olan Prezident İlham Əliyevin "Euronews" telekanalına müsahibəsindən fraqment də yer alıb.

"Yaxın illərdə iqtisadiyyat neft və qazın hesabına yüksəlməyəcək. Ona görə yox ki, neft və qazın qiyməti aşağı düşüb. Ona görə ki, iqtisadiyyatın digər sahələri – sənaye, turizm, xidmət, kənd təsərrüfatı və əlbəttə, İKT sektoru inkişaf edir. Artıq ənənəvi olaraq keçirilən bu sərgi bir daha Azərbaycanın regionda telekommunikasiya və informasiya texnologiyaları sahəsində lider ölkələrdən biri olduğunu nümayiş etdirir", - deyə ölkə başçısı bildirib.

Reportajı diqqətinizə çatdırırıq:

Baxış sayı: 683