MARAQLI

Tarix:04/08/17

Virtual reallıq kaskasına qoşulan kompüterli çanta təqdim olunub

“HP” şirkəti virtual reallıq kaskasına qoşulmaq üçün kompüterli çanta təqdim edib.

“ICTnews” Elektron Xəbər Xidməti “theRunet” resursuna istinadən yazır ki, “Z VR Backpack” adlanan çanta şirkətlərə əməkdaşları virtual reallıq eynəkləri vasitəsilə təlim keçməyə kömək edəcək, eləcə də müştərilərə məhsulların maketini “3D” formatında nümayiş etdirmək istəyən şirkətlər üçün əlverişli hesab edilir. Məsələn, daşınmaz əmlak agentliklərində müştərilərə bu şəkildə evləri göstərmək mümkün olacaq. Yeni sistemdən hərbçilərin, kosmonavtların məşqi, eləcə də uzaq məsafələrə yük daşıyan sürücülərin təlimi üçün istifadə etmək olar. Çantanı “HTC Vive Business Edition” və ya “Oculus Rift” virtual reallıq kaskalarına qoşmaq mümkündür.

Bildirilir ki, iyunda ABŞ istehsalçısı “Omen X Compact Desktop” çanta kompüterini nümayiş etdirsə də, o, “B2B” bazarı üçün deyil, oyun həvəskarları üçün nəzərdə tutulub. Yeni kompüter əvvəlki versiyadan güclüdür və dizaynı kiçikölçülüdür. Hər iki qurğuda “Intel Core i7” prosessoru quraşdırılıb, lakin biznes üçün olan versiyanın qrafikası daha yaxşıdır (Nvidia GeForce GTX 1080 prosessoru “Quadro P5200” ilə əvəz edilib). Qurğu 32 giqabayt operativ yaddaşla təchiz edilib.

Satışına sentyabrda başlanacaq yeni kompüterin qiyməti 3299 dollar təşkil edəcək. Çantaya onu adi masaüstü kompüterə çevirən birləşdirici stansiya qoşmaq olar.

Nizam Nuriyev

Baxış sayı: 347