XƏBƏRLƏR

Tarix:14/09/17

Avropa Kibermühafizə Agentliyinin yaradılması təklif olunur

Avropa Komissiyası Avropa İttifaqının ölkə və müəssisələrini kiberhücumlardan qorumağa imkan verəcək Avropa Kibermühafizə Agentliyinin yaradılmasını təklif edir. Təkliflə Avropa Komissiyasının sədri Jan-Klod Yunker çıxış edib.

“ICTnews” Elektron Xəbər Xidməti “RİA Novosti” resursuna istinadən yazır ki, komissiya rəhbəri Avropa Parlamentinin Strasburqda plenar sessiyası çərçivəsində çıxışı zamanı Aİ-yə üzv dövlətlərin kibertəhdidlərdən yetərincə yaxşı mühafizə olunmadığını bildirib. “Kiberhücumlar demokratiya və sabitlik üçün silah və tanklardan daha çox təhlükə yarada bilər, çünki internetdə dövlət sərhədləri anlayışı mövcud deyil”, - o qeyd edib.

Onun sözlərinə görə, təkcə ötən il Aİ ölkələrində 4 mindən çox kiberhücum qeydə alınıb. Avropa şirkətlərinin təxminən 80 faizi müxtəlif növ kibertəhdidlərlə rastlaşıb. “Hazırda Avropa Komissiyası kibertəhlükəsizliklə bağlı problemlərin həlli yollarının axtarışı ilə məşğuldur”, - komissiya sədri vurğulayıb.

Bildirilir ki, kiberhücumların sərhədlərlə məhdudlaşmaması səbəbindən komissiya bu gün hücumlardan yaxşı qorunmaq üçün yeni alətlər, o cümlədən Avropa Kibermühafizə Agentliyinin yaradılmasını təklif edir.

Nizam Nuriyev

Baxış sayı: 301