XƏBƏRLƏR

Tarix:04/10/17

2018-ci ildə qlobal İT xərclərin həcmi 3,7 trilyon dollar təşkil edəcək

“Gartner” analitik şirkətinin qiymətləndirməsinə görə, 2018-ci ildə informasiya texnologiyaları sahəsində qlobal xərclər 3,7 trilyon dollara yaxınlaşacaq ki, bu da 2017-ci ilə proqnozlaşdırılmış 3,5 trilyon dollarla müqayisədə 4,3% daha çoxdur.

“ICTnews” Elektron Xəbər Xidməti “dailycomm.ru” saytına istinadən yazır ki, korporativ proqram təminatı və İT xidmətlər seqmentində daha çox müsbət dinamika gözlənilir, amma qlobal İT xərclərinin ən böyük hissəsi rabitə xidmətlərinin payına düşəcək.

Mütəxəssislər hesab edirlər ki, 2017-ci ildə korporativ proqram təminatına xərclər 8,5% artaraq 354 milyard dollar təşkil edəcək. 2018-ci ildə bu göstərici 9,4% artaraq 387 milyard dollar təşkil edəcək. Bu il İT xidmətlər seqmentində 4% artım, gələn il isə 5,3% artım proqnozlaşdırılır.

2017-ci ildə rabitə xidmətləri üzrə qlobal xərclər 0,9% artaraq 1,39 trilyon dollar təşkil etməlidir. 2018-ci ildə isə artım tempi 2,2%-dək artaraq 1,42 trilyon dollara bərabər olacaq.

Emil Hüseynov

Baxış sayı: 296