XƏBƏRLƏR

Tarix:05/02/18

“Nokia Sirocco” əmtəə nişanı bərpa ediləcək

"HMD Global" şirkəti "Nokia" mobil telefonları üçün bahalı "Sirocco" əmtəə nişanını bərpa etmək niyyətindədir. Bu məqsədlə "TA-1005" nömrəli model üçün "Nokia 8 Sirocco" əmtəə nişanı qeydiyyatdan keçirilib.

"ICTnews" Elektron Xəbər Xidməti "Ferra" resursuna istinadən yazır ki, "Sirocco" 2006-cı ildə buraxılan məşhur bahalı "Nokia 8800 Sirocco" telefonunun davamı olacaq. Sapfir şüşə və polad panellərin istifadə edildiyi, eləcə də dəstə dəri çexolun daxil olunduğu qurğu o vaxt ən bahalı "Nokia" modeli hesab edilib.

Bildirilir ki, əvvəllər "TA-1005" model nömrəsi buraxılışı gözlənilən qabaqcıl "Nokia 9" smartfonuna aid edilib. Bu dəfə isə məlum olub ki, model "Nokia 8 Sirocco" adı ilə buraxıla bilər.

İlkin məlumatlara görə, smartfon "LG" şirkətinin istehsalı olan "OLED" ekran, "Qualcomm Snapdragon 835" prosessoru, 12+13 meqapikselli qoşa əsas və "selfie" üçün qoşa ön kamera və 3250 milliamper/saat tutumlu akkumulyator ilə təchiz ediləcək.

Smartfonun təqdimatı fevralın 26-dan martın 1-dək Barselonada keçiriləcək "MWC 2018" sərgisində planlaşdırılır.

Nizam Nuriyev

Baxış sayı: 342