XƏBƏRLƏR

Tarix:13/04/18

Göz xəstəliklərini müstəqil diaqnozlaşdıran proqram yaradılıb

ABŞ Ərzaq Məhsulları və Dərman Preparatlarının Keyfiyyətinə Nəzarət İdarəsi (FDA) gözün tor qişasının fotoşəkillərinə görə diabetik retinopatiyanı diaqnozlaşdıran alqoritmin praktik tətbiqini təsdiq edib. Tərtibatçıların sözlərinə görə, “IDx-DR” adlı proqram diaqnozun qoyulması üçün həkim-mütəxəssisin iştirakını tələb etmir.

“ICTnews” Elektron Xəbər Xidməti “Naked Science” resursuna istinadən yazır ki, “IDx-DR” alqoritmi şəkərli diabetin ən ağır xəstəliklərindən biri olan diabetik retinopatiyanın aşkarlanması üçün nəzərdə tutulub. Xəstəliyə metabolizm dəyişiklikləri ilə əlaqədar mikrosirkulyasiya pozulmaları səbəb olur. Diabetik retinopatiya tor qişasının damarlarına nüfuz edir və bəzi hallarda tam korluğa gətirib çıxarır. Proqram kompüter təlimi texnologiyalarından istifadə edir: onun üçün material qismində xəstələrin sağlamlıq vəziyyəti haqqında məlumatlarla müqayisə edilən tor qişasının milyonlarla fotoşəkili çıxış edir. Oxşar metodikalar onkoloji xəstəliklərin diaqnozlaşdırılmasında geniş yayılıb.

Məlumata görə, proqram tor qişası kamerası tərəfindən çəkilən şəkillərdən istifadə edir. Bu alətin oftalmologiyada istifadə olunmasına görə klinikalar üçün əlavə qurğuların əldə olunmasına və quraşdırılmasına ehtiyac qalmır. İlkin mərhələdə alqoritm fotoşəkillərin analiz üçün kifayət qədər aydınlığa malik olmalarını müəyyənləşdirir. Daha sonra “IDx-DR” proqramı təsvirləri əvvəlcədən öyrənilmiş məlumatlarla tutuşduraraq diabetik retinopatiya üçün xarakterik olan tor qişası damarlarının zədələnməsi əlamətlərini aşkarlayır.

Alqoritmin klinik tədqiqatında şəkərli diabetdən əziyyət çəkən 900 xəstə iştirak edib. Proqram diabetik retinopatiyalı xəstələrin 87,4 faizinə düzgün diaqnoz qoymağa nail olub. Bu göstərici tor qişası xəstəliklərindən əziyyət çəkməyən insanların müəyyənləşdirilməsində 89,5 faiz təşkil edib.

“FDA” nümayəndələrinin sözlərinə görə, metodika oftalmoloqlara vaxta qənaət etməyə kömək edəcək və digər ixtisaslı həkimlər üçün yararlı olacaq. Məsələn, ümumi praktikalı həkim süni intellektin proqnozu əsasında xəstəni əsas simptomlar (xəstəliyin ilkin mərhələsində rast gəlinməyən ağrı, görmə qabiliyyətinin azalması) yaranmamışdan əvvəl oftalmoloqa yönəldə biləcək.

Nizam Nuriyev

Baxış sayı: 484