XƏBƏRLƏR

Tarix:26/09/18

“Intel Core i5” səviyyəli prosessor yaradılıb

Çinin “Zhaoxin” şirkəti “x86” arxitekturası əsasında “Intel” və “AMD” məhsulları ilə rəqabət aparacaq “KX-6000” prosessorunu təqdim edib.

“ICTnews” Elektron Xəbər Xidməti “Ferra” resursuna istinadən yazır ki, istehsalçı nümayəndələrinin sözlərinə görə, masaüstü kompüter, noutbuk və serverlər üçün hazırlanan yeni prosessor “Hyper-threading” texnologiyasını dəstəkləmədən yeddinci nəsil “Intel Core i5” prosessorları ilə müqayisə ediləcək məhsuldarlığı təmin edir.

Məlumata görə, 16 nanometrlik “FinFET” texnoloji prosesi üzrə istehsal edilən “KX-6000” prosessoruna 3 QHs takt tezlikli dörd və ya səkkiz nüvə, ikinci səviyyəli 8 meqabaytlıq quraşdırılmış yaddaş daxildir və ikikanallı “DDR4-3200” yaddaşını dəstəkləyir.

Müqayisə üçün qeyd edək ki, əvvəlki “Zhaoxin” məhsulu – “KX-5000” prosessoru 26 nanometrlik texnoloji proses üzrə istehsal edilib, dördnüvəli və 2 QHs takt tezlikli olub.

“KX-6000” prosessorunun satışa çıxarılma müddəti və təxmini qiyməti barədə məlumat verilmir.
“Zhaoxin” Çin hökuməti və “Via Technologies” şirkətinin birgə müəssisəsidir.

Nizam Nuriyev

Baxış sayı: 472