XƏBƏRLƏR

Tarix:11/11/11

İran polisi Güney Azərbaycanda evlərdən peyk antenalarını yığışdırır

İran polisi evlərdə quraşdırılan peyk antenalarının yığışdırılması məqsədilə xüsusi əməliyyata başlayıb. Yerli dövlət qurumlarının nümayəndələrinin də iştirakı ilə şəxsi evlərdə qapalı yerlərdə quraşdırılan peyk antenalarının yığışdırılması prosesi sürətləndirilib.

Güney Azərbaycanın əyalətlərində polisin zor tətbiq etməklə həyata keçirdiyi əməliyyatlar zamanı sökülən peyk antenalarının çanaqları yararsız hala salınır və qurğuların sahiblərinə qarşı inzibati qaydada tədbir görülür. Ötən gün isə polis Azərbaycan türklərinin sıx yaşadığı Meşkin şəhərində çanaqları sökərək, yarasız hala salıb.

Əhali bunu İran dövlətinin vətəndaşları informasiya blokadasına almaq və dünyadan təcrid etmək siyasəti kimi dəyərləndiriblər. Əməliyyat zamanı dəfələrlə şəhərin sakinləri ilə polis arasında qarşıdurma yaranıb. Çanaqların yararsız hala salınmasına etiraz edən bəzi şəxslər polis şöbələrinə aparılıb.

Qeyd edək ki, İranda islam inqilabından sonra qoyulan sərt qadağalardan biri də peyk antenaları ilə bağlıdır. Bu səbəbdən vətəndaşlar yaşadıqları evin və ya binanın damında peyk antenaları üçün gizli yerlər düzəldərək xarici telekanalları izləyirlər.

Antenaların sökülməsində məqsəd İran vətəndaşlarının, əsasən də azərbaycanlıların Türkiyə və Azərbaycan, o cümlədən xarici televiziya kanallarını izləməsinin qarşısını almaqdır.

Baxış sayı: 2671