XƏBƏRLƏR

Tarix:13/09/19

Yeni “iPhone” smartfonlarının real texniki xüsusiyyətləri məlum olub

“Apple” şirkəti tərəfindən sentyabrın 10-da təqdim edilmiş yeni smartfonların ətraflı texniki xüsusiyyətləri “GSMArena” saytında dərc edilib.

“Apple” şirkətinin nümayəndəsi yeni smartfonların təqdimatı zamanı məlumat vermişdi ki, “iPhone 11” cihazı “iPhone Xr”dən 1 saat, “11 Pro” və “Pro Max” aparatları isə “Xs” və “Xs Max”la müqayisədə müvafiq olaraq 4 və 5 saat daha çox işləyir.

“ICTnews” Elektron Xəbər Xidməti “lenta.ru” saytına istinadən yazır ki, “iPhone 11” aparatı 3110 milliamper/saat tutumlu akkumulyatora malikdir, “Xr” aparatında isə bu göstərici 2942 milliamper/saat təşkil edir. Beləliklə, akkumulyatorun tutumu 5% artıb. “iPhone 11 Pro” aparatında akkumulyator batareyasının tutumu 3190 milliamper/saat, “Xs” qurğusunda isə 2658 milliamper/saat (20% artım) təşkil edir. “11 Pro Max” aparatı 3500 milliamper/saat tutumunda batareya ilə təchiz edilib, “Xs Max”da bu göstərici 3174 milliamper/saat (10% artım) təşkil edir. Həmçinin hər üç smartfon əvvəlki nəsil qurğulardan daha qalın və daha ağırdır.

Bundan başqa, hər 3 smartfonda əməli yaddaşın tutumu yüksəlib. “iPhone 11” smartfonu 4 QB əməli yaddaş (“iPhone Xr” aparatında bu göstərici 3 QB-dır), “11 Pro” və “Pro Max” cihazları isə 6 QB (“Xs” və “Xs Max” cihazlarında 4 QB-dır) əməli yaddaşla təchiz edilib.

Emil Hüseynov

Baxış sayı: 560