XƏBƏRLƏR

Tarix:26/11/19

“Huawei” süni intellekt laboratoriyası açıb

“Huawei Technologies” şirkəti Sinqapurda süni intellekt sahəsində layihələrin sınağının aparılacağı xüsusi laboratoriya açıb. Bu məqsədlə “Huawei” bir sıra texnoloji şirkətləri əməkdaşlığa cəlb edib.

“ICTnews” Elektron Xəbər Xidməti “DailyComm” resursuna istinadən yazır ki, laboratoriyada süni intellekt üzrə tədqiqat və işləmələrin sadələşdirilməsi məqsədilə süni intellektin yaradılması üçün təcrübi məhsul nümunələri, pulsuz sınaq versiyaları və alətlər təqdim olunacaq.

Laboratoriya iştirakçıları sürücüsüz avtomobillər, robot texnikası, “ağıllı” istehsal və dəniz əməliyyatlarının aparılması kimi sahələr üçün süni intellekt layihələrinin inkişafı ilə məşğul olacaqlar.

Məlumata görə, şirkətin dünya üzrə tədqiqat və işləmələr şöbələrinin əməkdaşlarının sayı 80 minə çatır. Lakin onlar şirkətin işçi heyətinin ümumi sayının 45 faizini təşkil edir.

2018-ci ildə Çin istehsalçısı tərəfindən tədqiqat və işləmələrə investisiyaların həcmi 15 milyard dolları ötüb. Avropa İttifaqı tərəfindən dərc edilən sənaye istehsalı sahəsində elmi tədqiqat və təcrübi-konstruktor işlərinə investisiyalar reytinqində şirkət ötən il dünyada beşinci yeri tutub.

Yaxın illərdə “Huawei” açıq süni intellekt, intellektual hesablama sistemləri və dərin təlim sistemlərinin Avropada tətbiqini planlaşdırır.

Nizam Nuriyev

Baxış sayı: 698