XƏBƏRLƏR

Tarix:08/04/20

“Microsoft” 2021-ci ilin iyulunadək bütün tədbirləri onlayn rejimdə keçirəcək

Koronavirus pandemiyası texnologiya şirkətlərini 2020-ci ilin yaz və yay aylarına planlaşdırılmış ictimai tədbirləri ləğv etməyə və ya onları onlayn rejimdə keçirməyə məcbur edib. “Microsoft” korporasiyası 2021-ci ilin iyulunadək bütün daxili və ictimai tədbirləri onlayn keçirmək qərarına gəlib. Bu haqda “The Verge” saytı yazır.

“ICTnews” Elektron Xəbər Xidməti “hitech.newsru.com” saytına istinadən yazır ki, “Microsoft” rəhbərliyinin bu qərarına əsasən, sentyabrda “Microsoft Ignite” konfransı onlayn rejimdə keçiriləcək. Həmçinin korporasiya pandemiyaya görə sentyabrda keçiriləcək “Computex 2020” sərgisində virtual iştirak edəcək. Gələn il “Microsoft” Las-Veqasda keçiriləcək “CES” sərgisində iştirak etməyəcək və öz “Build” konfransını onlayn rejimdə keçirəcək.

Xatırladaq ki, hazırda “Microsoft”un əməkdaşlarının əksəriyyəti evdən işləyir. Şirkət əməkdaşlarının işini təşkil etmək, müxtəlif görüş və tədbirlərin onlayn rejimdə keçirilməsi üçün uzaq məsafədən komanda şəklində işləmək üçün nəzərdə tutulmuş “Microsoft Teams” xidmətindən istifadə edir.

Emil Hüseynov

Baxış sayı: 541