XƏBƏRLƏR

Tarix:06/10/20

Britaniyada kompüter nasazlığı 16 min “COVID-19” yoluxma faktını silib

Böyük Britaniya Milli Səhiyyə Xidmətində (National Health Service – NHS) kompüterdə baş verən nasazlığa görə 16 min “COVID-19” yoluxma faktı haqqında məlumatlar yoxa çıxıb. İnsident nəticəsində yoluxan şəxslərlə minlərlə potensial kontaktı izləmək mümkün olmayıb.

“ICTnews” Elektron Xəbər Xidməti “SecurityLab” resursuna istinadən yazır ki, insident laboratoriya tədqiqatlarının nəticələrinin qeyd olunduğu “Excel” elektron cədvəli ilə bağlı olub. Belə ki, yerin bitməsi səbəbindən cədvəldə yenilənmələr dayanıb. Nəticədə sentyabrın 25-dən oktyabrın 2-dək qeydə alınan 15841 yoluxma faktı dövlət uçot cədvəlinə əlavə edilməyib.

Məlumat itkisi Böyük Britaniyada epidemiyanın miqyasının real mənzərəsini təhrif etməklə yanaşı, kritik vacib məlumatların kontaktların izlənilməsi vasitələrinə ötürülməməsinə və virusun təsirinə məruz qalan insanların izlənilməməsinə gətirib çıxarıb.

İnsidentlə əlaqədar Böyük Britaniyanın Səhiyyə naziri Mett Henkok şəhər rəhbərlərinin iştirakı ilə təcili iclas keçirmək niyyətindədir.

Hazırda 16 min yoluxmanın nəzərə alınmamasına səbəb olan texniki problem “Excel” fayllarının hissələrə bölünməsi ilə həll olunub.

Nizam Nuriyev

Baxış sayı: 201