XƏBƏRLƏR

Tarix:19/10/20

“HTC” şirkəti “Snapdragon” prosessoru və tutumlu akkumulyatora malik smartfon təqdim edib

“HTC” şirkəti indi çətin anlarını yaşayır, amma yenə də smartfon istehsalına davam edir. Tayvan brendinin növbəti modeli “Desire 20 ” aparatının əsas xüsusiyyətləri 7-ci seriyalı 8 nüvəli “Snapdragon” prosessoru, keyfiyyətli kamera və yüksək tutumlu akkumulyatordur.

“ICTnews” Elektron Xəbər Xidməti “4pda.ru” saytına istinadən yazır ki, “HTC Desire 20 ” smartfonu 1600x720 piksel təsvir ölçülü 6,5 düymlük IPS displeylə təchiz edilib. Ekranda 16 mp-lik ön kamera üçün kiçik dəlik nəzərdə tutulub. Smartfonun arxa tərəfində barmaq izləri skaneri və işıqlandırıcıya malik 4 kameradan ibarət blok yerləşir. Əsas modul obyektivin diafraqması f/1.8 olan 48 mp-lik sensordan ibarətdir. Əlavə olaraq 115 dərəcəlik baxış bucağına malik 5 mp-lik genişbucaqlı obyektiv, 5 mp-lik dərinlik datçiki və 4 sm məsafədən fokuslanma qabiliyyətinə malik 2 mp-lik makroobyektiv nəzərdə tutulub.

6 QB əməli yaddaşa malik 8 nüvəli “Snapdragon 720G” prosessoru aparat platforması kimi çıxış edir. 128 QB-lıq daxili daşıyıcının tutumunu “microSD” yaddaş kartının köməyi ilə artırmaq olar. “Quick Charge 4.0” sürətli enerjidoldurma texnologiyasını dəstəkləyən 5000 milliamper/saat tutumlu akkumulyator qurğunun avtonom işini təmin edir. Həmçinin qulaqlıqlar üçün konnektor nəzərdə tutulub. “NFC” modulunun mövcudluğu alış-verişin ödənişi üçün smartfondan istifadə etməyə imkan verir. Aparat “Android 10” sisteminin idarəetməsi altında işləyir.

“HTC Desire 20 ” aparatının qiyməti 295 dollar təşkil edir.

Emil Hüseynov

Baxış sayı: 256