XƏBƏRLƏR

Tarix:30/04/21

“Skyworth” şirkəti istifadəçilərə qarşı casusluq etməkdə ittiham edilib

Çinin “Skyworth” televizor istehsalçısı istifadəçilərə qarşı casusluq etməkdə ittiham edilib.

“ICTnews” Elektron Xəbər Xidməti “SecurityLab” resursuna istinadən yazır ki, “ağıllı” televizor hər 10 dəqiqədən bir “Wi-Fi” şəbəkəsinə qoşulan digər qurğuları axtarmaq məqsədilə otağı skan edib.

Casusluq aktivliyi “Skyworth” televizorunun istifadəçiləri tərəfindən aşkarlanıb. Tədqiqatçıların sözlərinə görə, bunun üçün televizorlara xüsusi “Gozen Data” proqram təminatı quraşdırılıb. O, “IP” və “MAC” ünvanlarını və şəbəkəyə qoşulmuş qurğuların adlarını toplayaraq onları “gz-data.com” platformasına ötürüb.

Şirkət məlumatların izlənmə üçün deyil, hədəfli reklam üçün istifadə edildiyini bildirsə də, ekspertlərin fikrincə, “Android Smart TV” əməliyyat sistemi Çin hökuməti tərəfindən kənd yerlərindəki insanların evlərini izləmək üçün xüsusi olaraq işlənib hazırlanıb.

“Skyworth” nümayəndələri bəyan edib ki, məlumatların toplanılması vətəndaşları izləmək üçün deyil, kommersiya məqsədləri üçün istifadə edilir. Həmçinin istifadəçilərdən məlumatların emalı üçün icazə alınır.

Nizam Nuriyev

Baxış sayı: 992