XƏBƏRLƏR

Tarix:01/09/18

“Huawei” yeni nəsil çip təqdim edib

“Huawei” şirkəti Berlində keçirilən “IFA 2018” beynəlxalq sərgisində yeni nəsil “Kirin 980” qabaqcıl prosessorunu təqdim edib.

“ICTnews” Elektron Xəbər Xidməti “life.ru” saytına istinadən yazır ki, bu, smartfonlar üçün 7 nanometrlik texnoloji proses üzrə hazırlanmış ilk çipdir. Şirkətin iddiasına görə, “Kirin 980” prosessoru əvvəlki çipdən 58-75% daha məhsuldardır.

“Huawei” şirkəti, həmçinin yeni prosessorun süni intellekt imkanları haqda məlumat verib və onu “Snapdragon 845” və “A11” ilə müqayisə edib. Şirkət rəsmisinin sözlərinə görə, “Kirin 980” prosessoru təsviri “Qualcomm”un qabaqcıl çipindən 22% və “Apple” şirkətinin prosessorundan 3 dəfə daha sürətli tanıyır.

“GPU Turbo” proqram təminatı nəticəsində sözügedən çipin imkanları daha da artacaq. Sözügedən proqram təminatı qrafik prosessorun məhsuldarlığını 60% artırır və enerji sərfiyyatını 30% aşağı salır.

“Kirin 980” prosessoru ilk dəfə “Huawei Mate 20” və “Mate 20 Pro” smartfonlarında tətbiq ediləcək.

Emil Hüseynov

Baxış sayı: 540