XƏBƏRLƏR

Tarix:23/02/19

Dünya mobil internet trafikinin həcmi 1 zettabayta çatacaq

"Cisco" şirkəti 2022-ci ilədək dünya mobil internet trafikinin illik həcminin 1 zettabayta (270 bayt) çataraq qlobal IP trafikinin təxminən 20 faizini təşkil edəcəyini proqnozlaşdırır. Bu, 930 eksabayta bərabərdir və 2012-ci ildə generasiya edilən bütün trafikdən 113 dəfə çoxdur.

"ICTnews" Elektron Xəbər Xidməti "Searchengines" resursuna istinadən yazır ki, bununla yanaşı, 5 il ərzində dünyada mobil qurğu istifadəçilərinin sayının 5,5 milyard təşkil edəcəyi gözlənilir. 2017-ci ildə bu göstərici 5 milyard olub.

Bildirilir ki, smartfonlardan istifadənin çoxalması ilə yanaşı, şirkət "Əşyalar interneti" (IoT) qurğularının populyarlığının davamlı yüksələcəyini və mobil şəbəkələrdə məlumatların ötürülmə sürətinin 3 dəfə artacağını proqnozlaşdırır.

"Cisco" şirkətinin qiymətləndirməsinə görə, 2022-ci ilədək internetə qoşulan "Əşyalar interneti" qurğularının sayı 12 milyardı ötəcək ki, bu da 2017-ci ilin nəticəsindən 3 milyard çoxdur.

Bundan əlavə, 2022-ci ildə "5G" şəbəkəsinin tətbiqi sayəsində qlobal mobil şəbəkənin orta sürəti 2017-ci ildəki 8,7 Mbit/saniyədən 28,5 Mbit/saniyəyədək yüksələcək.

"5G" şəbəkəsinin populyarlığına baxmayaraq "Wi-Fi" yaxın gələcəkdə əksər insanlar üçün əsas internetə qoşulma üsulu olaraq qalacaq. Şirkətin qiymətləndirməsinə görə, 5 il sonra "Wi-Fi" şəbəkəsinin bütün mobil internet trafikində payı 59 faiz təşkil edəcək. 2017-ci ildə bu göstərici 54 faizə bərabər olub.

Xatırladaq ki, Beynəlxalq Telekommunikasiya İttifaqının qiymətləndirməsinə görə, 2018-ci ilin sonunda dünyada internet istifadəçilərinin sayı 3,9 milyard və ya planet əhalisinin 51,2 faizini təşkil edib.

Nizam Nuriyev

Baxış sayı: 525