Dünyada ən sürətli “ağıllı” telefon təqdim ediləcək (VİDEO)
“İCTnews” elektron xəbər xidməti “onliner.by” resursuna istinadən xəbər verir ki, “Huawei” şirkəti bu gün, fevral ayının 27-si tarixində İspaniyanın Barselona şəhərində start götürəcək sərgiyə “Ascend D quad” smartfonunu gətirib.
Smartfon bundan əvvəl güman edildiyi kimi 4 nüvəli “ARM” prosessorla təchiz edilib. Maraqlısı odur ki, smartfonda “Tegra 3” qrafik prosessoru deyil, Çin istehsalçısının şəxsi “K3V2” hazırlaması istifadə olunub. 4 nüvənin hər biri 1,5 QHs takt tezliyində işləyə bilər.
“Huawei” şirkəti iddia edir ki, “Ascend D quad” smartfonu dünyada ən məhsuldar smartfondur. Çin istehsalçısının bəyanatına görə, “Ascend D quad” smartfonu rəqib qurğularla müqayisədə 30% az enerji istifadə edir.
“Huawei Ascend D quad” smartfonu 4.5 düymlü 720x1280 piksel təsvir ölçülü ekranla təchiz edilib. Smartfon 2 kameradan ibarətdir. Aparatın qalınlığı 8,9 millimetr təşkil edir. O, 1800 mA/saat tutumlu akkumulyatorla təchiz edilib.
