2013-cü ilin əvvəlində “eTwinning Plus” layihəsinə start veriləcək
2013-cü ilin əvvəlində "eTwinning Plus" layihəsinə start verilməsi planlaşdırılır. "ICTnews" elektron xəbər xidmətinə bu barədə "Mədəd Azərbaycan" təşkilatından məlumat verilib.
Təşkilatdan bildirilib ki, cari ilin noyabr ayında Brüsseldə Avropa Komissiyasının Təhsil və Mədəniyyət Komitəsi tərəfindən "eTwinning Plus" layihəsi üzrə gələcək "Tərəfdaşa Dəstək" ölkələri nümayəndələri üçün təlim keçirilib:
"Avropa Qonşuluq Siyasəti Aləti çərçivəsində Azərbaycan, Ermənistan, Gürcüstan, Moldova, Ukrayna və Tunisdən olan mütəxəssislər layihə haqqında daha ətraflı öyrənmək üçün bir araya gəliblər. Məqsəd potensial tərəfdaş olan ölkələrin nümayəndələrini lazımi qaydada məlumatlandırmaq və layihə aktivləşdirildikdə onların rolunun nədən ibarət olacağını ətraflı izah etmək idi.
Həmçinin təlim "Tərəfdaşa Dəstək" ölkələrinin qrant üçün müraciət edərkən üzərilərinə götürəcəkləri öhdəliklərin müəyyənləşdirilməsi və həmin ölkə nümayəndələrinin milli kontekstə uyğun olaraq rəy və təkliflərini səsləndirmələri üçün dəyərli imkan yaradıb". Tədbirdə Azərbaycanı təmsil edən nümayəndə heyəti Təhsil Nazirliyi Təhsil Sisteminin İnformasiyalaşdırılması İdarəsinin Monitorinq və qiymətləndirmə şöbəsinin müdiri Ramil Süleymanov, "Mədəd Azərbaycan" təşkilatının tədqiqat və inkişaf üzrə meneceri Ülkər Babayeva, tədqiqat və inkişaf üzrə mütəxəssisi Məryəm Cabbarovadan ibarət olub.
Tədbirin əhəmiyyətini vurğulayan Ülkər Babayeva qeyd edib ki, Azərbaycanın "eTwinning" layihəsinə qoşulması ölkəmizin Avropa təhsil məkanında tanınmasına birbaşa təsir edəcək: "Bu layihə müəllim və şagirdlərimizin ölkələrarası layihələrdə iştirakı, onlarda yaradıcı yanaşmanın formalaşması, əməkdaşlıq və xarici dillərdə ünsiyyət qurma bacarıqlarının təkmilləşdirilməsi, informasiya-kommunikasiya texnologiyalarının real tətbiqi, həmçinin mədəniyyətlərarası bilik və təcrübənin bölüşməsi üçün gözəl vasitədir".
HƏQİQƏT
NRYTN
TEXNOLOJİ YENİLİKLƏR
POÇT
XƏBƏRLƏR
HAQQIMIZDA
İKT
ŞAD KODLARI
TANINMIŞLAR
MÜSAHİBƏLƏR
MARAQLI
TƏHLİL
