Fransa smartfonlara və planşetlərə vergi tətbiq edəcək
Fransa hökuməti smartfon, planşet və digər bu kimi qurğulara vergi tətbiq etməyə hazırlaşır. "ICTnews" xəbər xidmətinin "www.cybersecurity.ru" saytına istinadən verdiyi məlumata əsasən, bu vergidən toplanan vəsaitlər fransız incəsənətinin, filmlərin və musiqinin qorunmasına və maliyyələşdirilməsinə buraxılmalıdır. Bu təkliflə ölkə prezidenti Fransua Olland yanında təsis edilmiş hökumət komissiyası çıxış edib.
Komissiyanın bəyanatında qeyd edilib ki, vergi "Fransanın müstəsna sərvətinin və nəhəng mədəni irsinin rəqəmli əsrdə qorunması"na yönəlib. Vergi çərçivəsində hökumət 4%-lik rüsumu ölkə sərhədindən keçirilən smartfon və planşetlərin idxal qiymətindən çıxacaq.
Vergi eyni zamanda, "internet vasitəsi ilə mədəni kontentə çıxış əldə etməyə imkan verən" elektron riderlərə və geniş çeşidli digər qurğulara tətbiq ediləcək. "Bir sıra şirkətlər hazırda aktiv olaraq istehlakçıları planşet əldə etməyin vacibliyinə inandırırlar. Onlar öz qurğularının satışlarından əldə edilən gəlirlərin kontent yaradıcıları ilə bölünməsində iştirak etməlidirlər ", - deyə Fransanın mədəniyyət naziri Oreli Filippeti bildirib.
Onun sözlərinə əsasən, vergi gələn ilin büdcəsinə daxil edilə bilər. Hökumət komissiyasının məruzəsində bildirilir ki, qeyd edilən vergi rəqəmli iqtisadiyyatda mövcud olan disbalansın aradan qaldırılmasında effektiv vasitə ola bilər.
"Vergini kontentin yaradılmasında iştirak edən, lakin qurğu istehsalçısı ilə birbaşa əməkdaşlıq etməyən kontent yaradıcıları üçün kompensasiya kimi də istifadə etmək mümkündür ", - Filippeti deyib.
Planşet və smartfon istehsalçılarının maraqlarının müdafiəsi ilə məşğul olan "DigitalEurope" assosiasiyası, Fransa hökumətinin son təşəbbüsünü düzgün addım kimi qiymətləndirib. Digər tərəfdən, "Canal Plus"un keçmiş rəhbəri Pyer Leksye deyir ki, bu vergi Fransanın tez dəyişən rəqəmli dünyaya uyğunlaşmaq cəhdidir.
Fransanın mədəniyyət naziri bildirib ki, vergi "çox aşağı səviyyədə" müəyyən edilib. Əvvəl onlar 1% səviyyəsində verginin təyin edilməsini təklif edirdilər, bu da nazirliyin büdcəsini ildə 90 milyon avro artıra bilər, lakin siyasətçilər verginin 3-4% həcmində təyin edilməsini daha məqsədəuyğun hesab ediblər.
Xatırladaq ki, Fransa bir müddət öncə sərt disklərə və mühafizə sistemlərinə olan vergiləri təsdiq edib və bu, fiziki daşıyıcılara yazılan kontentin satışı ilə bağlı gəlir itkiləri ilə mübarizə aparmağa imkan verir.
Ölkə miqyasında illik vergi 200 milyon avrodan çox təşkil edir. Avropa Birliyinin digər ölkələri Fransanın bu hərəkətini bəyənməyiblər.
Aynur Vəliyeva
NRYTN
TEXNOLOJİ YENİLİKLƏR
POÇT
XƏBƏRLƏR
HAQQIMIZDA
İKT
ŞAD KODLARI
TANINMIŞLAR
MÜSAHİBƏLƏR
MARAQLI
TƏHLİL
