ADİU-nun rektoru: “Elektron sənəd dövriyyəsinin tətbiqi ilə universitetin kargüzarlıq sistemində kağızdan istifadə tamamilə ləğv olunub”
Azərbaycan Dövlət İqtisad Universitetində (ADİU) elektron sənəd dövriyyəsinin təqdimatı keçirilib. Tədbirə Azərbaycanın İKT sahəsi üzrə ekspertləri və digər ali təhsil müəssisələrinin nümayəndələri qatılıb.
ADİU-nun rektoru, professor Ədalət Muradov bildirib ki, elektron sənəd dövriyyəsinin tətbiqi ilə universitetin kargüzarlıq sistemində kağızdan istifadə tamamilə ləğv olunub.
Ə.Muradov əlavə edib ki, "Doc.net" proqram təminatı əsasında hazırlanan yeni sənəd dövriyyəsi qənaətcillik, çeviklik və şəffaflıq baxımından xeyli faydalıdır. O, digər universitetlərə də elektron sənəd dövriyyəsinin tətbiqi istiqamətində köməklik göstərməyə hazır olduqlarını bildirib. Mərasimdə "Ultra" şirkətinin nümayəndələri ADİU-da tətbiq edilən elektron sənəd dövriyyəsinin fəaliyyət istiqamətləri barədə iştirakçılara geniş məlumat veriblər. Bildiriblər ki, sistem Azərbaycan Respublikası Prezidentinin 2003-cü il 27 sentyabr tarixli 935 nömrəli Fərmanı ilə təsdiq edilmiş "Dövlət hakimiyyəti orqanlarında, idarə, təşkilat və müəssisələrində kargüzarlığın aparılmasına dair Təlimat"a tam uyğunlaşdırılıb.
İştirakçılara məlumat verilib ki, sistem üzərindən dünyanın istənilən yerindən sənədə icazə almaq, imzalamaq və ya gözdən keçirmək mümkün olacaq. Qeyd olunub ki, mobil cihazlar vasitəsilə də sistemə qoşularaq bu imkanlardan yararlanmaq olacaq. İnterfeysi Azərbaycan dilində olan proqram təminatının təhlükəsizliyi ən qabaqcıl texnologiyalar əsasında hazırlanıb.
Təqdimatçılar sistemin hazırlanmasında və istifadəsində "Oracle", DELPHİ və "Java" texnologiyalarından, bulud platformasından, həmçinin "Microsoft", "HP", "Cisco" avadanlıqları, eyni zamanda proqram təminatlarından istifadə edildiyini diqqətə çatdırıblar.
Sonda İKT sahəsi üzrə ekspertlər və "Ultra" şirkətinin nümayəndələri tədbir iştirakçılarının suallarını cavablandırıblar.
Həqiqət İSABALAYEVA
NRYTN
TEXNOLOJİ YENİLİKLƏR
POÇT
XƏBƏRLƏR
HAQQIMIZDA
İKT
ŞAD KODLARI
TANINMIŞLAR
MÜSAHİBƏLƏR
MARAQLI
TƏHLİL
