Beynəlxalq poçtdaşımalarında fırıldaqçılığın qarşısı alınıb
Azərbaycanda internet istifadəçilərinin sayının çoxalması və poçt sisteminin inkişaf etdirilməsi həm elektron ticarətin həcminin böyüməsinə, həm də beynəlxalq poçtdaşımalarının artımına təsir edib.
Ölkə əhalisi arasında xarici ölkələrdən elektron qaydada alış-veriş edənlərin sayı günü-gündən artdığı bir zamanda hökumətin e-ticarəti dəstəkləməsindən və beynəlxalq poçtdaşımalarının üstünlüklərindən istifadə edənlər də öz ehtiyaclarını internet üzərindən həyata keçirirlər. Lakin bəzi şəxslər yaradılan şəraitdən sui-istifadə edərək fırıldaqçılıq yolu ilə Azərbaycan ərazisinə gömrük baxışından gizlədilməklə informasiya-kommunikasiya texnologiyaları avadanlıqlarını gətirməyə cəhd edirlər.
Bununla bağlı məlumat yayan Dövlət Gömrük Komitəsi bildirir ki, son günlərdə bəzi işbazlar gömrük nəzarətindən yayınaraq əlavə qazanc əldə etmək məqsədilə respublikamıza göndərdikləri bağlamaların içərisində gizli şəkildə mobil telefonlar yerləşdirərək onları qaçaqmalçılıq yoluyla ölkəmizin gömrük sərhədindən keçirməyə çalışır. Bakı Baş Gömrük İdarəsinin Poçt Göndərişlərinə Nəzarət Bölməsində bu qəbildən 4 faktın üstü açılıb və ümumilikdə 62 mobil telefon aşkar edilib.
Birləşmiş Ərəb Əmirliklərindən göndərilən, üzərində alıcısının adı Əhməd Usubov kimi göstərilən və “generator” kimi bəyan edilən beynəlxalq poçt bağlaması rentgen aparatından keçərkən gömrükçülərdə şübhə doğurub. Aparılan yoxlama zamanı bağlamadakı elektrik tənzimləyicinin içərisində gizlədilən 2 adda 20 ədəd mobil telefon Poçt Göndərişlərinə Nəzarət Bölməsinin əməkdaşları tərəfindən aşkar edilib.
Eyni ölkədən Sevda Kazımova adına göndərilən və “piano” kimi bəyan olunan beynəlxalq poçt bağlaması da “Rapiskan” markalı rentgen aparatı vasitəsi ilə baxış keçirilərkən Poçt Göndərişlərinə Nəzarət Bölməsinin əməkdaşlarını şübhələndirib.
Yoxlama zamanı bağlamadakı iki ədəd sintezatora oxşar musiqi alətinin içərisinə yerləşdirilən və gömrük nəzarətindən gizlədilən mobil telefonlar gömrükçülərin şübhələrini təsdiq edib. Bu fakt üzrə ümumilikdə 26 ədəd mobil telefonun qanunsuz yolla ölkəyə keçirilməsinin qarşısı alınıb.
Birləşmiş Ərəb Əmirliklərindən beynəlxalq poçt göndərişləri vasitəsi ilə Bakı Baş Gömrük İdarəsi Poçt Göndərişlərinə Nəzarət Bölməsinə daxil olan, “işıq” kimi bəyan olunan və üzərində alıcısının adı Hilal Sadıxlı kimi göstərilən beynəlxalq poçt bağlamasından isə 7 ədəd mobil telefon aşkar edilib.
Birləşmiş Ərəb Əmirliklərindən Günay Məhərrəmli adına göndərilən bağlamadan da qaçaqmal - mobil telefon aşkar edilib. Bakı Baş Gömrük İdarəsi Poçt Göndərişlərinə Nəzarət Bölməsində içərisindəki mal “piano” kimi göstərilən beynəlxalq poçt bağlaması gömrükçülər tərəfindən yoxlanılıb. Yoxlama zamanı bağlamadakı sintezatora oxşar musiqi alətinin içərisindən 9 ədəd müxtəlif markalı mobil telefon aşkar edilib.
Faktlarla bağlı araşdırma aparılır.
SEYMUR
NRYTN
TEXNOLOJİ YENİLİKLƏR
POÇT
XƏBƏRLƏR
HAQQIMIZDA
İKT
ŞAD KODLARI
TANINMIŞLAR
MÜSAHİBƏLƏR
MARAQLI
TƏHLİL
