107 minə yaxın şəxsə iş yerinə dair arayış elektron formada verilib
Ölkədə iş yerinə dair kağız formasında arayışların elektron arayışlarla əvəzlənməsi prosesi getdikcə sürətlənir.
Bunu statistika da təsdiq edir. Belə ki, ötən ilin dekabrında istifadəyə verilən və həmin vaxtdan da əhalinin “Elektron hökumət” portalı üzərindən ən çox faydalandığı elektron xidmətlərdən biri olan “İş yerinə dair arayış” e-xidmətindən cari il avqustun 1-dək artıq 106942 dəfə istifadə edilib.
Əmək və Əhalinin Sosial Müdafiəsi Nazirliyinin (ƏƏSMN) “Elektron hökumət” portalı üzərindən təqdim etdiyi “İş yerinə dair arayış” elektron xidmətindən istifadə edən vətəndaşların sayı cari ilin yanvar ayı ilə müqayisədə 86 faiz artaraq iyul ayında 18547 nəfər təşkil edib.
Bu e-xidmət vətəndaşlara işəgötürənə müraciət etmədən, bunun üçün vaxt və əziyyət sərf etmədən ümumi təyinatlı və ya hər hansı bir konkret quruma təqdim etmək üçün qısa müddətdə iş yeri haqqında e-arayış əldə etməyə imkan verir. İş yerinə dair e-arayışda işəgötürən və işçi barədə məlumatlar, onlar arasında əmək müqaviləsinin bağlandığı tarix, həmin müqavilənin müddətli və ya müddətsiz olması, arayışın etibarlılıq müddəti və s. məlumatlar əksini tapır.
Nazirlikdən bildirilib ki, arayış əməkhaqqı göstərilməklə və ya göstərilmədən əldə edilə bilər. Vətəndaşlar aktiv əmək müqaviləsi əsasında iki və daha artıq iş yerində işlədikləri halda öz seçimləri əsasında bu və ya digər iş yerinə dair e-arayışı əldə etmək imkanına malikdirlər.
Eyni zamanda, e-arayışın təqdim edildiyi təşkilatlar sənəddə qeyd olunan ştrix-kod vasitəsilə “E-hökumət” portalındakı “Portal üzərindən verilmiş arayışların yoxlanılması” xidmətindən istifadə edərək, e-arayışdakı məlumatların, o cümlədən əməkhaqqı barədə göstərilənlərin düzgünlüyünü yoxlaya bilirlər. Bütün bunların nəticəsi kimi, iş yerinə dair kağız formasında arayışlar sürətlə elektron arayışlarla əvəzlənir.
Həqiqət İSABALAYEVA
NRYTN
TEXNOLOJİ YENİLİKLƏR
POÇT
XƏBƏRLƏR
HAQQIMIZDA
İKT
ŞAD KODLARI
TANINMIŞLAR
MÜSAHİBƏLƏR
MARAQLI
TƏHLİL
