"Seysmoloji məlumatların emalının və təfsirinin müasir metodları" mövzusunda seminar-məktəbin rəsmi açılışı olub
Azərbaycan Milli Elmlər Akademiyasının Respublika Seysmoloji Xidmət Mərkəzinin (RSXM) dəstəyi və Rusiya Elmlər Akademiyası Geofizika Xidmətinin təşkilatçılığı ilə "Seysmoloji məlumatların emalının və təfsirinin müasir metodları" mövzusunda X beynəlxalq seysmoloji seminar-məktəbin rəsmi açılışı olub.
"ICTnews" xəbər xidmətinin məlumatına əsasən, RSXM-in direktoru Qurban Yetirmişli bildirib ki, bu gün ABŞ-ın "Kinemetriks" şirkətinin istehsalı olan telemetrik peyk rabitəsi ilə işləyən 35 dəst telemetrik seysmik stansiyası vasitəsi ilə ölkədə seysmoloji vəziyyət müşahidə olunur. Bu stansiyaların 4-ü blokada şəraitində yaşayan Naxçıvan Muxtar Respublikası ərazisində, 3-ü isə Xəzər dənizinin Azərbaycan sektorunda quraşdırılıb. Bundan əlavə, Azərbaycan ərazisində geofiziki tədqiqatları genişləndirmək məqsədi ilə yeni GPS stansiyaların quraşdırılmasına başlanılıb və müxtəlif dövlətlərlə bu sahədə əməkdaşlığın genişləndirilməsi ilə bağlı danışıqlar aparılır.
Elmi sessiyada Azərbaycanda və Rusiyada seysmik müşahidələrə başlanılması tarixindən və seysmologiya üzrə aparılmış tədqiqatlardan danışılıb.
Üç gün davam edəcək seminarda müxtəlif ölkələrin seysmoloq alimlərinin məruzələri dinləniləcək və müzakirələr aparılacaq. Sentyabrın 18-də isə seminar iştirakçıları Şamaxıya səfər edəcəklər.
Seminarda Azərbaycan, ABŞ, Rusiya, Gürcüstan, Qazaxıstan, İtaliya, Böyük Britaniya və digər ölkələrdən 100-dən artıq seysmoloq alim iştirak edir.
Aynur Vəliyeva
NRYTN
TEXNOLOJİ YENİLİKLƏR
POÇT
XƏBƏRLƏR
HAQQIMIZDA
İKT
ŞAD KODLARI
TANINMIŞLAR
MÜSAHİBƏLƏR
MARAQLI
TƏHLİL
