Süni intellekt tərəfindən musiqi əsərlərinin bəstələnməsi, musiqi albomlarının yazılması artıq reallıqdır. Belə ki, “IAMAI” musiqi albomu tamamilə elektron bəstəkar tərəfindən yazılmış musiqidən ibarətdir.
“ICTnews” Elektron Xəbər Xidməti “belta.by” saytına istinadən yazır ki, ilk öncə “Amper” süni intellekti mağaza və ofislər üçün sakit mahnılar bəstələməli idi ki, onların sahiblərinin müəlliflik hüququ ilə bağlı problem olmasın. Amma sonra süni intellektin yaradıcıları belə proqramın əsl mahnıların yaradılmasında faydalı ola biləcəyi barədə düşünüblər.
Müğənni Tarin Sautern ilə birgə ilk albomun çıxarılmasına dair qərar verilib. Sözlərin müəllifi olan müğənni həm də vokal partiyalarını ifa edib. O, temp, ritm və musiqi stili təyin edib, “Amper” süni intellekti isə saniyələr ərzində onun sözlərinə musiqi bəstələyib.
Süni intellekt öz iştirakı ilə ilk klipin yaradılmasında iştirak edib. Əlbəttə, bu kompozisiyanı musiqi sənətinin şah əsəri adlandırmaq çətindir, amma bu, yalnız başlanğıcdır.
