VI Bakı Beynəlxalq Humanitar Forumunda innovativ məhsul, xidmət və tətbiqlərin nümayiş olunduğu sərgi keçirilir
Bu gün VI Bakı Beynəlxalq Humanitar Forumu öz işinə başlayıb. Dövlət və hökumət başçılarının, Nobel mükafatı laureatlarının, dünyada tanınmış ictimai-siyasi xadimlərin iştirak etdiyi bu forum artıq ənənə halını alıb.
Qeyd edək ki, Bakı Beynəlxalq Humanitar Forumu bəşəriyyətdə maraq doğuran qlobal xarakterli məsələlərə dair geniş spektrli dialoqlar, fikir mübadilələri və müzakirələr aparmaq məqsədi ilə 2011-ci ildən keçirilir. Tədbir işini sabah yekunlaşdıracaq.
Forumun vəzifəsi ideyalar, nəzəri və praktiki bilik mübadiləsi, konstruktiv debat və müzakirələr üçün nəzəri və tətbiqi platforma yaratmaqdır.
Bu mötəbər tədbirdə Nəqliyyat, Rabitə və Yüksək Texnologiyalar Nazirliyinin nümayəndələri müxtəlif mövzuları əhatə edən məruzələrlə çıxış edəcəklər.
Bundan başqa, Forum günlərində Heydər Əliyev Mərkəzində nazirlik tərəfindən innovativ məhsul və xidmətlərin, startapçıların uğurlu tətbiqlərinin nümayiş olunduğu pavilyon da fəaliyyət göstərir.
Pavilyon "Robopark", "I2B İdeyadan Biznesə", "Startaplar" və "Kommersiyalaşdırılmış layihələr" zonalarından ibarətdir.
Ümumilikdə pavilyonda robotiks kursları, dronlar, küləklə işləyən cihazlar, xilasedici, rəngləri tanıyıb müvafiq qaydada ayıra bilən, müxtəlif əşyaların yerini təyin edən robotlar nümayiş olunur.
Bundan başqa, pavilyonda "İdeyadan Biznesə" layihəsi çərçivəsində həm respublikanın ayrı-ayrı regionlarında, həm də Bakı şəhərində yerləşən ali təhsil ocaqlarından seçilən 3 qalib startapçı öz layihələrini təqdim edir. Həmin layihələr, "Xilaskar qolbaq", "Ağıllı ev" və "Virtual tur" layihələridir.
"Xilaskar qolbaq" insan təzyiqində qeydə alınan problemlərlə bağlı yaxınlıqdakı tibb məntəqələrinə və ya sahə həkimlərinə məlumatların ötürülməsini təmin edir.
"Ağıllı ev" məişət cihazlarının məsafədən idarə olunmasına, rutin ev işlərinin avtomatlaşdırılmasına hesablanıb.
"Virtual tur" isə onlayn rejimdə turizm obyektlərinin müəyyən edilməsi, bronlaşdırılması üzrə tətbiqdir.
Xaricdə təhsil alan startapçılar da nazirliyin pavilyonunda öz məhsullarını təqdim etmək şansı qazanıb. Belə ki, Estoniyada magistr təhsili alan startapçıların "ZoomX" şirkəti görmə qabiliyyətinin balanslaşdırılmasına xidmət edən eynəklərini nümayiş etdirir.
Layihə nəticəsində mobil tətbiqetmə vasitəsilə idarə olunan və istifadəçiyə eynəyin nömrəsini (-6; +3 aralığında) öz görmə qabiliyyətinə uyğun tənzimləməyə imkan verən "ZoomX" dəyişən fokuslu dinamik eynək prototipidir.
Həmçinin, monitor vasitəsi ilə məkanları müşahidə edə bilən virtual reallıq (VR) eynəkləri də təqdim edilir.
Pavilyonun digər eksponatı olan avtomobil sürücüləri üçün nəzərdə tutulan "Wake me Up" tətbiqi logistika, sərnişindaşıma və uzaq yol qət edən sürücülər üçün faydalıdır. Proqram təminatı ilə işləyən rahat və innovativ qurğu insanların planlaşdırılmamış yuxulamasının qarşısını alır. Belə ki, göz qapağının hərəkətinə əsaslanan qurğu insanın yatılı və yaxud oyaq olmasını müəyyən edir. Əgər göz qapağı üç saniyədən artıq qapalı olarsa, bu o deməkdir ki, insan yatıb. Bunu müəyyən edən sensor dərhal xüsusi alqoritm ilə işləyən emal qurğusuna məlumatı göndərir.
Sərgidə təqdim edilən "Camtouch" tətbiqi isə kompüterin "mouse"-u vasitəsi ilə istənilən statik şəkili hərəkətə gətirir.
Sosial əhəmiyyətli "Braille teach" cihazı görmə qabiliyyəti məhdud şəxslərin barmaq toxunuşu ilə əlifbanı öyrənməsini asanlaşdırır.
Pavilyonun kommersiyalaşdırılmış layihələr bölməsində Azərbaycanın rəqəmsal mədəni irsinin də təbliğ olunduğu "Google Art & Culture" beynəlxalq rəqəmli incəsənət və mədəniyyət platforması fəaliyyət göstərir. Belə ki, dünyanın yüzlərlə təşkilatları, tədbirləri, obyektləri, eləcə də, bir neçə Azərbaycan muzeyinin də rəqəmli kontentləri bu platformada cəmləşib.
Bu bölmədə ziyarətçilərin diqqətini çəkəcək "Virtual cərrahiyyə" də təqdim olunur ki, bu layihə rəqəmli texnologiyaların tətbiqi vasitəsilə bərpaedici cərrahiyyədə yüksək funksional və estetik nəticələr əldə etməyə imkan verir.
Qeyd edək ki, sözügedən layihələrin hər biri Nəqliyyat, Rabitə və Yüksək Texnologiyalar Nazirliyinin yanında İnformasiya Texnologiyalarının İnkişafı Dövlət Fondundan qrant almış və Yüksək Texnologiyalar Parkının rezidenti olan startap layihələridir.
Pavilyon "InnoExpo" adı altında "İnnovasiyalar həftəsi" çərçivəsində Heydər Əliyev Mərkəzində keçiriləcək tədbirlər zamanı da öz işini davam etdirəcək.
Bu zaman sərgidə "Qlobal İnfluenser Günü"nün təşkilatçıları olan "Keepface DMCC" və "FA International Trade Events" tərəfindən innovativ startap layihələri və xidmətlər nümayiş olunacaq.
Məlumat üçün bildirək ki, 26-30 oktyabr tarixlərində Heydər Əliyev Mərkəzində "Bilik İqtisadiyyatı – "Azərbaycanın İnnovasiya Yol Xəritəsi Layihəsinin təqdimatı", "İdeyadan Biznesə" startap turunun finalı, "Qlobal İnfluenserlər Günü", "AzInTelecom"dan təhlükəsiz bulud infrastrukturu" konfransları, "Baku Open Cyber Cup" kiber idman turniri, "Əqli mülkiyyət hüquqları" ilə bağlı seminar və "İKT karyera trendləri" konfransı keçiriləcək.
NRYTN
TEXNOLOJİ YENİLİKLƏR
POÇT
XƏBƏRLƏR
HAQQIMIZDA
İKT
ŞAD KODLARI
TANINMIŞLAR
MÜSAHİBƏLƏR
MARAQLI
TƏHLİL
